Lögreglan á höfuðborgarsvæðinu hefur að undanförnu fjarlægt skráningarnúmer af tugum ökutækja víðsvegar á höfuðborgarsvæðinu.
Í Facebook-færslu lögreglunnar kemur fram að ökutækin hafi ýmist verið ótryggð eða óskoðuð, jafnvel hvoru tveggja.
„Mjög mikið er um ótryggð og óskoðuð ökutæki í umdæminu en lögreglan hvetur eigendur og umráðamenn þeirra til að gera þar bragarbót á. Lögreglan heldur eftirlitinu áfram og ítrekar að ökumenn hafi þetta í lagi svo ekki þurfi að koma til fyrrnefndra aðgerða, en þeim fylgja töluverð óþægindi fyrir ökumennina sjálfa,“ segir lögreglan.
