Í dag reyna aðilar vinnumarkaðarins til þrautar að ná kjarasamningum og ef það tekst ekki verða verkföll í ferðaþjónustunni á morgun. Sigmundur Vilhjálmsson – Simmi Vill – sem meðal annars er þekktur fyrir að vera annar stofnandi Hamborgarafabrikkunnar, segir að 85% fyrirtækja í landinu hafi ekki svigrúm til launahækkana. Segir hann að vandamál lægri stétta samfélagsins aukist við launahækkanir. Meginmarkmiðið núna sé að tryggja atvinnu í landinu. Simmi segir að laun séu há í landinu og þetta snúist ekki um laun, heldur hvað fáist fyrir þau.
Splunkunýr pistill Simma um kjaramálin er eftirfarandi:
Það er stór dagur í dag. Fyrirheit SA og Verkalýðsfélaga um að klára samninga ráðast í dag. Að öðrum kosti er verkfall á morgun.
Ég hef leyft mér að hafa á þessu skoðun og hef verið talinn hugrakkur fyrir að láta þá skoðun mína í ljós. Það á ekkert skylt við hugrekki að vilja segja skoðun sína á málunum, það er í raun skylda okkar allra að gera slíkt. Þessar kjaraviðræður snúast ekki um þá lægst-launuðu og þá hæst-launuðu. Þær snúast um okkur öll.
Staðreyndin er þessi, það er ekkert svigrúm fyrir launahækkanir hjá 85% allra fyrirtækja í landinu og þar með hjá 85% allra landsmanna.
Launahækkanir nuna munu hækka verðlag, það mun leiða til verðbólgu og vaxtahækkana.
Ísland er með hæstu meðallaun í Evrópu og mjög hátt verðlag.
Vandamál lægstu stétta verða meiri og stærri við launahækkanir, það er staðreynd.
Ég kom inná það á fundi Litla Íslands fyrir nokkru að vinnumarkaður og atvinnurekendur þurfa að standa saman og fá Ríkið að borðinu. Það þarf að lækka vexti, aflétta tryggingargjöldum og setja kraft í að greiða götu atvinnulífsins til að standa af sér það tímabil sem við stöndum frammi fyrir í dag. Þvi við þurfum að tryggja atvinnu og áframhaldandi kaupmátt almennings.
Ríkisbúskapurinn þarf að taka til í sínum rekstri og skila þeirri tiltekt til almenning í formi aukinna lífsgæða.
Þetta snýst ekki um laun, því þau eru há, þetta snýst um hvað við fáum fyrir launin okkar.
Regluverk á leigumarkaði, regluverk á fasteignamarkaði (fyrir eintaklinga og fyrirtæki) er nauðsynlegt og vil ég benda á Sænskar reglugerðir í því samhengi.
Ég vona því að kjaramalin verði leyst í dag með sem minnstri launahækkun, lægstu stéttum til heilla og þar með okkur öllum.
Góðar stundir.
