Gunnar Smári Egilsson segir Morgunblaðið hafa náð botni í sögu sinni með frétt um Báru Halldórsdóttur og Klaustursupptökuna í gær. Morgunblaðið fullyrti þá í fyrirsögn að myndaeftirlitsupptökur sýni að Bára Halldórsdóttir hafi undirbúið hlerun sína á samræðum þingmanna Miðflokksins á Klaustur Bar fyrir fram. Blaðið hefur þetta eftir Bergþóri Ólasyni sem segist styðjast við skoðun lögfræðings síns á eftirlitsupptökunni. Bára hefur hins vegar sjálf séð upptökuna og frásögn hennar af innihaldi hennar stangast algjörlega á við fullyrðingar Bergþórs. Þetta kom fram í viðtali DV við Báru í gær.

Gunnnar Smári skrifar eftirfarandi um frétt Morgunblaðsins á Facebook-síðu sína:

„Forsíðufrétt Morgunblaðsins, blaðs sem á sér æði skuggalega sögu, en hefur líklega aldrei farið í gegnum annað eins myrkur og þessi misserin. Mogginn fjallar um Klausturdónanna sem fórnarlömb samsæris, menn sem grípa í hvaða falsvon sem er fremur en að taka ábyrgð á orðum sínum. Algjör botn í sögu Morgunblaðsins; blaðið er auðsjáanlega í höndum manna sem eru ekki aðeins lélegir blaðamenn heldur afleitir stjórnmálamenn. Enda menn sem bera sök á niðurbroti samfélagsins á síðustu áratugum; velferðarkerfisins, stjórnmálanna og hins lýðræðislega vettvangs.“