VR hefur tilkynnt að félagið muni gera kröfu í þrotabú WOW air fyrir útistandandi launum, launum í uppsagnarfresti og áunnum réttindum félagsmanna.

Félagið bendir félagsmönnum á mikilvægi þess að skila inn gögnum vegna málsins, launaseðlum síðustu sex mánaða, ráðningarsamningi og öðrum gögnum.

„Rétt er að nefna að launakröfur eru forgangskröfur í þrotabú sem þýðir að slíkar kröfur eru greiddar fyrstar ef einhverjar eignir eru fyrir hendi í búinu. Ef þrotabúið reynist eignarlaust eru launakröfur tryggðar hjá Ábyrgðarsjóði launa upp að hámarki 633.000 á mánuði. Launakröfur síðustu þriggja mánaða í starfi eru tryggðar auk allt að þremur mánuðum í uppsagnarfresti.“

Félagsmönnum VR er bent á að skrá sig sem fyrst sem atvinnulausa hjá Vinnumálastofnun þar sem bætur eru greiddar frá þeim degi sem umsókn berst og jafnframt forsenda fyrir greiðslum úr Ábyrgðarsjóði launa.

„Þar sem laun vegna marsmánaðar verða ekki greidd af félaginu hefur stjórn VR ákveðið að lána starfsmönnum ákveðna upphæð vegna marslauna sem VR fær svo greitt frá Ábyrgðarsjóði launa þegar uppgjör á sér stað. Greiðslan mun ekki nema hærri upphæð en sem sjóðurinn tryggir.“