Karlmaður á fimmtugsaldri var fluttur í járnum á bráðamóttöku í vikunni eftir að hafa reynt að svipta sig lífi á skrifstofu Rauða krossins. Kvennablaðið fjallar um þetta en maðurinn sem um ræðir heitir Mohsen og er hælisleitandi frá Íran. Þessi sami maður hékk utan á göngubrú yfir Miklabraut þann 7. febrúar.
Í frétt Kvennablaðsins kemur fram að maðurinn hafi dvalið á Íslandi undanfarna tíu mánuði. Mohsen var á skrifstofu Rauða krossins á þriðjudag í opnum viðtalstíma fyrir umsækjendur um alþjóðlega vernd. Svo virðist vera sem hann hafi veitt sér áverka á háls með eggvopni, en heimildir Kvennablaðsins herma að hann hafi verið fluttur á bráðamóttöku Landspítalans í járnum. Sauma þurfti tíu spor í hálsinn.
Sema Erla Serdar, stofnandi Solaris, hjálparsamtaka fyrir hælisleitendur og flóttafólk á Íslandi, fjallaði um mál Mohsen í febrúar síðastliðnum. Sema sagði að Mohsen hafi flúið frá Íran vegna pólitískra ofsókna. Sagði hún að hann væri bæði andlega og líkamlega veikur og hefði þjáðst af slæmri gyllinæð í marga mánuði. Afleiðingar þess hefðu verið hrikalega sársaukafullar og hræðilegar, en þó ekki nógu slæmar til Útlendingastofnun væri tilbúin að greiða fyrir aðgerð sem Mohsen þurfti til að geta gengið eðlilega á ný.
Þann 22. febrúar síðastliðinn skrifaði Sema Erla á Facebook:
„Samt sem áður fékk hann enga aðstoð og upplifði svo miklar þjáningar og vonleysi að hann neyddist til þess að grípa til örþrifaráða eins og hungurverkfalls, sjálfsskaða og hótana um að taka sitt eigið líf vegna þess að hann fær ekki nauðsynlega heilbrigðisþjónustu. Um er að ræða enn eitt dæmið um ómannúðlega og grimma meðferð Útlendingastofnunar á fólki á flótta.“
Í frétt Kvennablaðsins kemur fram að Mohsen vilji koma því á framfæri að hann vilji ekki né myndi vinna öðrum mein. Eftir að hafa fengið meðhöndlun á bráðamóttöku í vikunni ræddi sálfræðingur þar stuttlega við hann. Að sögn Kvennablaðsins var hann spurður hvort hann myndi reyna að svipta sig lífi á nýjan leik. Mohsen er sagður hafa svarað því játandi en samt var honum sagt að fara heim en tjáð að hann gæti komið í hópmeðferðartíma á sjúkrahúsinu daginn eftir.
Í frétt Kvennablaðsins er haft eftir fulltrúa Rauða krossins að Útlendingastofnun eigi að bera ábyrgð á því að fylgjast með ástandi skjólstæðinga sinna eftir atvik sem þessi og sjá til þess að þeir njóti viðhlítandi heilbrigðisþjónustu. Þrátt fyrir það virðist Útlendingastofnun ekki hafa yfirsýn yfir tölfræði tilvika sem þessara, það er sjálfsskaða flóttafólks eða þeirra sem leita eftir vernd hér á landi.
