„Málið er nú komið í hendur lögreglunnar á höfuðborgarsvæðinu. Ég ber fullt traust til embættisins og trúi því að málið verði rannsakað af fagmennsku. Að teknu tilliti til þessa mun ég ekki tjá mig meira um málið opinberlega að svo stöddu.“
Þetta hefur mbl.is eftir Carmen Jóhannsdóttur í yfirlýsingu sem hún sendi frá sér. Að sögn mbl.is hefur Carmen kært Jón Baldvin vegna kynferðislegrar áreitni sem hún telur hann hafa beitt sig á Spáni sumarið 2018.
Carmen steig fram í viðtali við Stundina í janúar síðastliðnum þar sem hún lýsti hinni meintu áreitni.
„Svo sat vinkona þeirra á milli þeirra og ég og mamma. Ég sat næst honum. Þegar ég stóð upp á einum tímapunkti og fór að skenkja í glösin, þá bara gerði kallinn sér lítið fyrir og byrjaði að strjúka á mér rassinn. Og ekkert bara rétt aðeins, heldur upp og niður strjúka á mér rassinn.“
Forsaga málsins er að Carmen heimsótti Jón Baldvin ásamt móður sinni, Laufey Ósk Arnórsdóttur síðasta sumar meðan HM í fótbolta stóð yfir. Laufey ólst upp á Ísafirði en hún var vinkona Aldísar, dóttur hjónanna.Var þeim boðið að gista hjá hjónunum.
Áreitnin sem Carmen kveðst hafa orðið fyrir átti sér stað stuttu eftir leik Íslands gegn Argentínu á HM en þá buðu Jón Baldvin og Bryndís gestum í mat á þaki húss þeirra.
