Baldur Kolbeinsson síbrotamaður ætti að vera lesendum DV vel kunnur en ítrekað hefur verið fjallað um afbrot hans, sem flest áttu sér stað á Litla-Hrauni. Árið 2017 kom til átaka á milli hans og annars fanga sem endaði með því að Baldur beit af efri vör fangans. Þar áður réðst hann gegn fanga og makaði saur í munn hans. Í fyrra barði hann svo 18 ára gamlan hælisleitanda frá Marokkó. Baldur hefur meira og minna setið í fangelsi frá sautján ára aldri.
Sjá einnig: Baldur og Trausti lúbörðu hælisleitandann
Undir lok síðasta árs virðist Baldri þó hafa verið sleppt úr fangelsi, í það minnsta miðað við ákæru á hendur honum sem DV hefur undir höndum. Ákæran er óvenju löng og áttu meint afbrot öll sér sér stað á tveggja mánaða tímabili í kringum jólin. Afbrotin eru margvísleg en rétt er að taka fram að hann er ekki sakaður um nein ofbeldisbrot.
Sjá einnig: Baldur beit vörina af Styrmi
Flest brotin tengjast fíkniefnum en frá 10. nóvember til 2. janúar var Baldur gómaður samtals níu sinnum með dóp í fórum sínum. Hann var oftast tekinn með nokkur grömm af amfetamíni en kókaín og e-pillur koma jafnframt við sögu.
Baldur er auk þess sakaður um þjófnað með því að hafa stolið hleðslutæki úr ólæstri bifreið. Hann er einnig sakaður um hlutdeild í þjófnaði með því að hafa tekið þátt í ráðbruggi að hnupla greiðslukortum úr íbúð. Því atviki er lýst svo í ákæru: „með því að hafa beint athygli húsráðanda annað svo að [hinn maðurinn] kæmist óséður inn og út úr íbúðinni með þýfið en skömmu síðar komust kortin í hendur [Baldurs] gegn greiðslu fíkniefna og sem hann hugðist nota“.
Sjá einnig: Slagsmál á Hrauninu: „Ég beit af honum vörina“
Baldur er ofan á allt þetta sakaður um fimm þjófnaðarbrot en alvarlegast hlýtur að teljast þjófnaður hans á jólagjöfum 23. desember síðastliðinn. Samkvæmt ákæru hnuplaði hann jólagjöfum og myndlykli af áfangaheimili Samhjálpar á Þorláksmessu í fyrra og voru áætluð verðmæti um 250 þúsund krónur. Í janúar er hann sagður hafa stolið skólatösku sem innihélt fartölvu úr Fjölbrautaskólanum í Breiðholti. Hér eru þó ótalin ýmis minni afbrot líkt og þjófnaður í Nettó.
Þessari meintu glæpaöldu Baldurs lauk svo 29. janúar síðastliðinn en þá var hann gómaður við að stela nammi úr sælgætisbar í söluturninum Hraunberg. Málið var tekið fyrir í Héraðsdómi Reykjavíkur í gær.
