Margrét Friðriksdóttir, athafnakona og stjórnandi Stjórnmálaspjallsins, tekur heldur illa í það að söng- og leikkonan Selma Björnsdóttir sjái um útfarir, líkt og greint var frá í gær. Margrét virðist telja að það muni kosta eilífð í helvíti ef Selma stýri útför hins látna. Ástæðan fyrir þessu er að Selma er athafnastjóri hjá félagi Húmanista – Siðmennt.

Í gær deildi Hlynur nokkur frétt um að að Selma ætlaði sér að sjá um útfarir hjá Siðmennt og skrifaði: „Gott mál, hún má hola mér niður, ef hún verður ekki orðin of gömul til þess. En eingöngu ef hún spilar „Dauði“ Með Skálmöld og „Apage Satana“ með Rotting Christ í útförinni. Annars neita ég að drepast!“

Margrét tekur ekki vel í þetta og svarar í athugasemd: „Góða ferð til helvítis til þín og allra sem að hafna kærleiksboðskap Jesú Krists og velja þessa leið, en Guð er kærleikur og þröngvar ekki trú að okkur, við höfum valið og það kallast trúfrelsi.“

Gísli Ásgeirsson þýðandi spyr að bragði hvort maður fari til helvítis ef maður er ekki í Þjóðkirkjunni. Því svarar Margrét: „Nei ég er ekki í Þjóðkirkjunni, en ef maður hafnar kærleiksboðskap Jesú Krists og frelsara okkar þá er það næsti viðkomustaður eftir þessa stuttu jarðvist sem við fáum hér á jörðinni.“

Selma lýsti afstöðu sinni í útvarpsþættinum Sunnudagsmorgunn með Jóni Ólafs um helgina. „Ég er húmanisti og búin að vera í mörg ár að reyna finna mig í trúmálum og átti erfitt með að velja einn af þessum 3000 guðum sem raunverulegan fyrir mig. Ég fór í búddisma og prófaði kirkjuna en sagði mig síðan úr Þjóðkirkjunni þegar ég var rúmlega tvítug og fann fljótlega Siðmennt. Það var ótrúlega mikil hjálp í því fyrir mig að geta gengið inn í samtök þar sem mér fannst ég eiga heima. Mér fannst ég vera komin heim og langaði til að láta gott af mér leiða og byrjaði að gifta fólk og taka þátt í nafnagjöfum og næst á dagskrá er að taka að mér útfarir líka,“ sagði Selma.