Lögreglan á Suðurnesjum hefur á síðustu dögum haft afskipti af allmörgum einstaklingum vegna fíkniefnamála. Í skeyti frá lögreglu kemur fram að karlmaður, sem færður var á lögreglustöð vegna gruns um fíkniefnasölu, hafi reynst vera með fíkniefni innan klæða. Í vörslum sínum var hann með hnúajárn, lyfseðilsskyld lyf sem ekki hafði verið ávísað á hann svo og myljara.

Þá segir lögregla að í húsleit sem gerð var í umdæminu í vikunni hafi fundist amfetamín og kókaín. Tveir karlmenn voru handteknir og viðurkenndi þeir eign sína á efnunum.

„Ökumaður sem ók bifreið sinni út af í Hvassahrauni reyndist vera með fíkniefni í vörslum sínum og var að auki grunaður um fíkniefnaakstur, sviptur ökuréttindum og á stolinni bifreið. Fimm ökumenn til viðbótar voru teknir úr umferð vegna gruns um fíkniefnaakstur. Tveir þeirra voru án ökuréttinda.“