Gengi hlutabréfa í Icelandair hrapaði um tæp 4,4 prósent við opnun markaða í morgun. Bréf voru seld á genginu 8,7 en lokagengi á föstudag var 9,1. Miklar sveiflur hafa verið á gengi bréfa í félaginu.
Á aðeins einni viku hafa þau hækkað í verði um 20,67%, en ef litið er til eins mánaðar aftur í tímann nemur hækkunin 10,83%. Allt önnur mynd blasir við ef þróun síðasta árs er skoðuð, en á þeim tíma hefur gengi bréfa í Icelandair lækkað um 42%. Hlutafjáreigendur hafa því þurft að taka þátt í sannkallaðri rússibanareið sem ekki sér fyrir endann á.
Eins og kunnugt er sleit Icelandair samningaviðræðum við Wow air í gær en til skoðunar var að kaupa félagið í heild sinni eða ákveðnar einingar þess. Að sögn forstjóra Icelandair var fjárhagsstaða Wow air þess háttar að ekki þótti fýsilegt að halda viðræðum áfram.
