„Einn þeirra tæplega 30 ökumanna sem lögreglan á Suðurnesjum hefur kært fyrir of hraðan akstur á undanförnum dögum sinnti ekki stöðvunarmerkjum lögreglubifreiðar á Reykjanesbraut heldur ók rakleiðis áfram í átt að Flugstöð Leifs Eiríkssonar.“

Svona hefst tilkynning frá lögreglunni á Suðurnesjum um ökumann sem lögreglumenn veittu eftirför á dögunum.

Lögreglumenn gáfu manninum merki um að stöðva bifreið sína en hann virðist ekki hafa verið á þeirri skoðun.

„Lögreglumenn veittu honum eftirför alllanga vegalengd en hann lét ekki segjast fyrr en annarri lögreglubifreið var ekið á móti honum og þá loks stöðvaði hann. Þarna var á ferðinni erlendur ferðamaður sem  játaði hraðaksturinn, sem mældist 157 km á klukkustund,  og greiddi sekt á staðnum.“

Lögreglan segir svo í skeyti sínu frá öðrum ökumanni sem veitt var eftirför. Sá stöðvaði ekki bifreið sína þrátt fyrir notkun forgangsljósa. Viðkomandi er grunaður um ölvunarakstur.

„Þá voru skráningarnúmer fjarlægð af nær tíu bifreiðum sem voru óskoðaðar eða ótryggðar. Enn fremur hafði lögregla afskipti af allmörgum ökumönnum sem virtu ekki stöðvunarskyldu, töluðu í síma undir stýri án handfrjáls búnaðar eða lögði bifreiðum sínum ólöglega.“