Þeir sem hunsað hafa greiðslur á sektum eða sakarkostnaði til ríkissjóðs er vissara að ganga frá sínum málum sem fyrst, það er segja ef þeir vilja komast hjá því að dúsa í fangelsi.
Nú um áramótin hófst átak hjá Fangelsismálastofnun þar sem einstaklingar sem skulda sektir hafa verið handteknir og færðir til afplánunar vararefsingar.
Þetta á til dæmis við um sektir og sakarkostnað samkvæmt ákvörðun dómstóla, sektarboð sem hafa verið árituð af héraðsdómi eða þá sektir og sakarkostnað samkvæmt staðfestum lögreglustjórasektum.
Nokkuð hefur borið á því að greiðslur hafa verið útvegaðar eftir að afplánun hófst.
Handtaka og fyrirvaralítil afplánun er harkalegt inngrip í líf fólks og því hvetur Fangelsismálastofnun alla þá sem ekki hafa gengið frá greiðslusamningi við innheimtumiðstöð sekta og sakarkostnaðar um að gera slíkt hið fyrsta og komast þannig hjá handtöku og afplánun í fangelsi.
