Brandur Karlsson, framtíðarfræðingur, hefur vakið athygli fjölmiðla í Nepal, þar sem hann dvelur þessa stundina að kynna sér óhefðbundnar lækningar og tækifæri í heilbrigðismálum.

Sjá einnig: 

Óvissuför Brands – „Þarna höfum við fullkomna hetjusögu þar sem hetjan stígur út í óvissuna“

„Þegar ég var 14 ára gamall las ég bókina, Flóttinn frá Kathmandu, eftir ameríska rithöfundinn Kim Stanley Robinson. Þessi frábæra skáldsaga fyllti mig af löngun til að  heimsækja Nepal við fyrsta tækifæri.“

Þetta hefur miðillinn The Himalayan Times eftir Brand Karlssyni í umfjöllun um heimsókn hans til Nepal og fyrirætlanir hans á meðan á dvölinni stendur.

Samkvæmt Brandi var ferðin frá Íslandi til Nepal „dásamleg pynting“. Hann fann fyrir miklum sársauka á leiðinni en segir að ferðin hafi verið þjáningarinnar virði. „Ég elska að vera komin í aðra menningu og umhverfi.“

„Ég veit að hér mun ég horfast í augu við versta aðgengi fatlaðra, sem ég hef nokkru sinni þurft að glíma við, en ég læt það ekki stöðva mig og ég mun láta á það reyna hversu langt ég kemst í þessum hjólastól.“

Brandur og ferðafélagar ætla að hafa samband við einstaklinga með fötlun í Nepal og eiga við þá samtal. „Ég mun líka verða leiðbeinandi fyrir nepalska frumkvöðla og koma á samstarfi við nepalska heilbrigðiskerfið og aðstoða aðra með fötlun við að gera sér grein fyrir styrkleikum sínum.“

Brandur ætlar líka að heimsækja skóla í Kathmandu og fræða nemendur um aðstæður fatlaðra á Íslandi og með hvaða móti hann hefur barist fyrir réttindum fatlaðra hérlendis.

Hann sagði The Himalayan Times að hann vildi brúa bilið milli fjallalandanna, Íslands og Nepal, til að uppfylla óskir Guðna Th. Jóhannessonar forseta.

„Forsetinn hefur veitt mér innblástur til að vera útsendari félagslegra breytinga,“ sagði Brandur og bætti við að lykillinn að slíkum breytingum sé að hans mati tækninn. Með henni sé hægt að bæta aðgengi fatlaðra.

Brandur mun veita hluta af því fjármagni sem hann hefur safnað til spítala í Banepa sem er sérhæfður í endurhæfingu barna með fötlun.

Hann sagði í samtali við The Himalayan Time að hann ætli að mála Himalaya fjöllin, en Brandur málar með munninum.  Hann greindi einnig frá því að hann leggi í Nepal stund á endurhæfingu með meistara í fornum læknavísindum í þeirri von að endurhæfingin geti bætt lífsskilyrði sín.