„Ég er mjög stressuð yfir þessu,“ segir kona sem býr í blokk í Írabakka í Breiðholti en maður í annarlegu ástandi gerði þar mikinn óskunda í nótt. Hélt hann til í sameigninni, stal fatapoka og reyndi að komast inn í íbúð snemma í morgun.
„Við höfum oft rekið hann út héðan áður og hann hefur ekki komist lengra inn en í anddyrið,“ segir konan en óljóst er hvernig maðurinn komst inn í húsið í nótt. „Það er möguleiki að hann hafi komist inn um þvottahúsgluggann en reyndar áttum við erfitt með að opna þann glugga innan frá og hann var lokaður í nótt,“ segir konan við DV. Lögregla kom tvisvar vegna málsins, fyrst í morgun og síðan í eftirmiðdaginn þegar konan tilkynnti um stolinn fatapoka.
„Við erum með sér þvottahús á hverri hæð og hann hafði burt með sér fatapoka úr þvottahúsinu okkar. svartan ruslapoka fullan af fötum. Hins vegar skildi hann eftir þýfi í kjallaranum, meðal annars föt sem hann hafði stolið af stráknum sem býr þar. Hann var svo út úr heiminum að hann hafði ekki rænu á að taka allt þýfið með sér heldur skildi sumt eftir í töskunum sínum sem fundust í þvottahúsinu í kjallaranum.“
„Hann lagðist líka hérna uppi á efstu hæðinni. Þar býr maður einn og þegar hann ætlaði í vinnuna í morgun þá liggur þarna bara einhver dópisti sofandi, hann reyndi að reka hann út en innbrotsmaðurinn hlýddi ekki. Þá hótaði hann lögreglunni og þá forðaði hann sér. Hann rústaði geymslu hér niðri og sat þar síðan í einhvers konar transi ofan á glerbrotahrúgu. Það var í nótt eða snemma á morgun,“ segir konan enn fremur við DV.
Alvarlegast þykir að maðurinn reyndi að lokka burt með sér 9 ára dreng úr húsinu. Hann bankaði upp á eldsnemma í morgun á dyr íbúðar á fyrstu hæð. „Níu ára drengur kom til dyra og hann reyndi að fá hann burtu með sér, hvíslaði: „Hey viltu ekki bara koma með mér?““
Maðurinn var farinn þegar lögreglan kom en lýsingin á honum passaði við mann sem lögreglan hafði haft afskipti af snemma um nóttina, áður en hann kom inn í húsið við Írabakka.
Rétt er fyrir íbúa í Breiðholti að vera á varðbergi gagnvart þessu manni en óvíst er hvort hann er í haldi lögreglunnar eða gengur laus. Lýsing á honum er eftirfarandi:
25-30 ára, hæð undir meðallagi, með axlarsítt brúnt hár í tagli.
„Það má alveg koma fram að þessi maður er mikið á ferli hérna í hverfinu,“ sagði konan að lokum við DV.
