Lögreglumenn í flugstöðvardeildinni á Keflavíkurflugvelli handtóku nýverið karlmann sem hafði framvísað stolnu vegabréfi í Flugstöð Leifs Eiríkssonar. Hann var að reyna að innrita sig í flug til Toronto þegar grunur vaknaði um að ekki væri allt með felldu varðandi vegabréfið. Maðurinn reiddist mjög vegna afskiptanna og öskraði hótanir að lögreglumönnum og starfsfólki á innritunarborði með ógnandi hætti.

Í viðræðum við lögreglu viðurkenndi hann að vera að reyna ferðast á stolnu vegabréfi. Kvaðst hann hafa keypt það í Hollandi á 500 evrur. Hann var því handtekinn og fluttur á lögreglustöð.

Þetta er í annað skiptið sem lögregla hefur afskipti af manninum þar sem hann hefur verið stöðvaður með skilríki annars manns.

Málið er í hefðbundnu ferli, að því er segir í tilkynningu frá Lögreglustjóranum á Suðurnesjum.

Veikir farþegar

Tveimur flugvélum hefur verið lent á Keflavíkurflugvelli á undanförnum dögum vegna veikinda farþega Var önnur vélin á leið frá Chicago til Varsjár þegar farþeginn veiktist. Þegar nánari skoðun hafði verið gerð á honum eftir lendingu hér var ákveðið að hann gæti haldið för sinni áfram.

Hin vélin var á leiðinni Montreal – Chicago – Islanbul þegar kona um borð kenndi sér meins og var hún flutt með sjúkrabifreið á Heilbrigðisstofnun Suðurnesja.