Styrkur svifryks er hár í dag, 4. mars, samkvæmt mælingum í mælistöðvum við Grensásveg og gatnamót Njörvasunds og Sæbrautar.

Í tilkynningu frá Reykjavíkurborg kemur fram að klukkan 14 hafi klukkutímagildi svifryks við Grensásveg verið 119,0 míkrógrömm á rúmmetra. Í mælistöð við Njörvasund/Sæbraut var klukkutímagildið á sama tíma 106,4 míkrógrömm á rúmmetra og í mælistöð við Egilshöll 33,4 míkrógrömm á rúmmetra. Í Fjölskyldu- og húsdýragarðinum var svifryksgildi 13,1 míkrógrömm á rúmmetra.

„Nú er hægur vindur og kalt, götur þurrar og ekki líkur á úrkomu. Næstu daga er því búist við svipuðum veðurfarsaðstæðum. Sólarhringsheilsuverndarmörkin fyrir svifryk eru 50 míkrógrömm á rúmmetra,“ segir í tilkynningunni en þar er almenningur jafnframt hvattur til að draga úr notkun einkabílsins við þessar aðstæður, nýta sér frekar almenningssamgöngur, sameinast í bíla eða nota aðra vistvæna samgöngumáta.

„Þeir sem eru viðkvæmir fyrir í öndunarfærum og börn ættu að forðast útivist í nágrenni stórra umferðagatna. Heilbrigðiseftirlit Reykjavíkur fylgist náið með loftgæðum borgarinnar og sendir frá sér viðvaranir og leiðbeiningar ef ástæða þykir til. Fylgjast má með loftgæðum á loftgæði.is.“