Á öðrum tímanum í nótt kom bíleigandi að aðila sem var að stela munum úr bifreið hans. Þjófinum varð greinilega illa við og hljóp af vettvangi og henti þýfinu frá sér á hlaupunum.

Klukkan tvö í nótt var tilkynnt um líkamsárás í miðborginni. Þolandi var með minniháttar áverka. Vitað er hver gerandinn er.

Á sjötta tímanum í gær var nokkrum aðilum vísað út úr verslun í Mjóddinni en fólkið var með leiðindi við starfsfólk og viðskiptavini.

Á sjötta tímanum í gær höfðu lögreglumenn afskipti af aðila í Kópavogi en sá var með meint fíkniefni meðferðis.

Einn ökumaður var handtekinn í Kópavogi í gærkvöldi grunaður um að vera undir áhrifum fíkniefna.

Þrír ökumenn voru handteknir í Breiðholti í gærkvöldi og nótt. Einn þeirra er grunaður um að hafa verið undir áhrifum fíkniefna og sviptur ökuréttindum. Bifreið hans reyndist ótryggð og voru skráningarmerkin því tekin af henni. Tveir þessara ökumanna eru grunaðir um ölvun við akstur og báðir reyndust þeir vera sviptir ökuréttindum.