Mikið framboð er af nýjum íbúðum til sölu í miðbæ Reykjavíkur og bendir ýmislegt til að markaðurinn sé mjög hægur, jafnvel frosinn. Samkvæmt lauslegri talningu DV eru um 150 nýjar íbúðir óseldar á fasteignasíðum og enn fleiri á leiðinni. Í Hagsjá Landsbankans í vikunni birtust vangaveltur um hvort verið væri að byggja of mikið af íbúðum hérlendis, eina ferðina enn. Margt virðist þó benda til þess að of mikið hafi verið byggt á röngum stað á höfuðborgarsvæðinu.
74% íbúða óseld
DV tók saman stöðuna á sölu nýrra íbúða í miðbæ Reykjavíkur. Samkvæmt fasteignasíðum eru fjölmargar íbúðir til sölu í alls tíu nýbyggingum, Geirsgötu 2 og 4, Tryggvagötu 13, Frakkastíg 8C, 8D og 8E, Hverfisgötu 58A, 58B og 94 auk Arnarhlíðar 1 sem tilheyrir Valssvæðinu svokallaða. Alls hafa 217 íbúðir í þessum húsum verið boðnar til sölu undanfarna mánuði en aðeins 56 eru seldar, ef mið er tekið af þinglýstum eigendum í Fasteignaskrá. Það þýðir að 74% íbúðanna eru óseld. Nokkrar vikur getur tekið að þinglýsa kaupsamningum á nýjar íbúðir og því eru þessar tölur birtar með þeim fyrirvara.
Flestir virðast sammála um að mikil umframeftirspurn sé eftir húsnæði á höfuðborgarsvæðinu og nærliggjandi svæðum. Það er því augljóst að ástæðan fyrir því að íbúðirnar seljast ekki er aðeins eitt, verðið.
Markaðurinn fyrir fasteignir í miðbænum er takmarkaður. Út af verðinu er ólíklegt að ungt fólk sem er að leita að sinni fyrstu eign eigi möguleika á að kaupa eignir. Þá eru minni líkur en meiri á að barnafólk hafi áhuga á að búa í slíkum eignum í miðbænum. Meginuppistaða markaðarins er því barnlaust fólk í eldri kantinum sem kannski er að minnka við sig og hugnast það vel að búa í hringiðu miðborgarinnar.
Fermetraverð eignanna í þessari úttekt DV er frá rúmlega 600 þúsundum króna og allt upp í tæplega eina milljón króna. Til samanburðar þarf að leita í skamma stund til þess að finna nýbyggingar í Grafarholti fyrir rúmlega 400 þúsund krónur á fermetrann.
Þá hlýtur að vera áhyggjuefni fyrir fjárfesta að talsvert magn af nýbyggingum á enn eftir að koma inn á markaðinn. Þar má nefna glæsilegar íbúðir við Austurbakka sem og mörg hundruð íbúðir á Valssvæðinu. Þar hafa íbúðir í fjölbýlishúsi við Arnarhlíð 1 verið í sölu í tæpa átta mánuði en aðeins 25 af 46 íbúðum hafa selst.
Geirsgata 2: Ein íbúð seld af 22. Fermetraverð: 780–947 þúsund krónur.
Geirsgata 4: Engin íbúð seld af 28. Fermetraverð: 790–946 þúsund krónur
Tryggvagata 13: Níu íbúðir seldar af 38. Fermetraverð 630–793 þúsund krónur.
Frakkastígur 8C: Fimm íbúðir seldar af 22. Fermetraverð 614–787 þúsund krónur
Frakkastígur 8D: Þrjár íbúðir seldar af 21
Frakkastígur 8E: Fjórar íbúðir seldar af 8
Hverfisgata 58A og 58B: Átta íbúðir seldar 16. Fermetraverð 604–791 þúsund krónur.
Hverfisgata 94: Ein íbúð seld af 16. Fermetraverð um 620 þúsund krónur.
Arnarhlíð 1: Tuttugu og fimm íbúðir seldar af 46. Fermetraverð á bilinu 650–740 þúsund krónur.
