Hildur Rúna Hauksdóttir hómópati og náttúruverndarsinni er látin, 72 ára að aldri. Hildur Rúna barðist ötullega fyrir ósnortinni náttúru á Íslandi og var einnig þekkt fyrir að vera móðir Bjarkar Guðmundsdóttur söngkonu.

Hildur Rúna fæddist í Reykjavík 7. október 1946. Hún var eina barn foreldra sinna, Guðrúnar Ásmundsdóttur og Guðjóns Tómassonar, en hún ólst upp hjá fósturföður sínum Hauki Guðjónssyni, gullsmið og múrara, sem síðar ættleiddi hana. Þetta kom fram í viðtali sem Hildur veitti Vikunni árið 1998.  Sagðist Hildur alltaf hafa verið uppreisnargjörn og „svolítill forsprakki“ í sér og kom það í ljós strax í gagnfræðaskóla þegar hún blés til mótmæla og krafðist þess að stúlkur fengju að læra smíði í skólanum líkt og strákar. Í kjölfarið var bekkur hennar fyrsti „stelpubekkurinn“ sem fékk að læra smíði við Gagnfræðiskólann við Lindargötu.

Hildur Rúna gekk í hjónaband með Guðmundi Gunnarsyni árið 1964 og eignuðust þau dóttur sína, Björk, ári síðar. Þau skildu árið 1968 þegar Hildur var 22 ára gömul. Síðar gekk Hildur í hjónaband með Sævari Árnasyni og eignuðust þau son, Arnar, árið 1970. Barnabörn Hildar eru tvö, þau Sindri Eldon Þórsson og Ísadóra Bjarkadóttir Barney.

Hildur brann fyrir andlegum málefnum og var mikil áhugamanneskja um náttúrulækningar. Hún lærði smáskammtalækningar í London og á Íslandi og starfaði við óhefðbundnar lækningar.

Sem fyrr segir var Hildur mikill náttúruverndarsinni og vakti það töluverða athygli þegar hún fór í hungurverkfall árið 2002 til að mótmælta virkjunaráformum á hálendi Íslands.

„Ég hef alltaf dáðst að landinu og lít svo á að við búum yfir forréttindum að eiga hreina og ósnortna náttúru. Að skemma hana fyrir okkur finnst mér hvílík spjöll að ég get ekki setið og horft á það án þess að leggja mitt af mörkum til að varna því,“ sagði hún meðal annars í samtali við Fréttablaðið á sínum tíma.

Útför Hildar fer fram frá Fossvogskirkju þann 6. nóvember næstkomandi.