Ekið var á lögreglubíl rétt fyrir klukkan 15 í dag á Suðurlandsvegi við Sandskeið. Málsatvik voru þau að lögreglumenn voru þar við hraðamælingar og höfðu mælt ökumann við hraðakstur og voru að ræða við ökumann í lögreglubifreiðinni er bifreið var ekið aftan á lögreglubifreiðina á töluverðum hraða. Er áreksturinn varð var lögreglubifreiðin kyrrstæð, vel fyrir utan akreinina og ekki inni á akbraut.

Tveir slösuðust við áreksturinn, annar lögreglumannanna og ökumaðurinn sem hafði skömmu áður verið stöðvaður af lögreglu en tveir aðrir fór á slysadeild til skoðunar.

Sjúkrabílar og tækjabíll komu á vettvang frá Slökkviliði höfuðborgarsvæðisins. Mennirnir eru ekki alvarlega slasaðir.