„Ef þú kemur ekki heim með kærasta næst, þá máttu ekki kalla mig móður þína,“
Ikea hefur beðist afsökunar og dregið auglýsingu sína til baka eftir að hafa verið gagnrýnt harðlega fyrir kynjamisrétti. Auglýsingin er sögð hafa dregið athygli að veikri stöðu einhleypra kvenna í Kína.
Ógiftar konur fá oft á sig stimpilinn „afgangs konur“ og finna þær fyrir miklum þrýsting samfélagsins um að gifta sig.
Auglýsing Ikea sýndi móður skamma dóttur sína fyrir það að hafa ekki komið heim með kærasta til að kynna fyrir foreldrunum.
„Ef þú kemur ekki heim með kærasta næst, þá máttu ekki kalla mig móður þína,“ segir móðir stúlkunnar í auglýsingunni.
Síðan birtist ungur maður í dyragættinni með blómvönd og eftir að hafa kynnt sig dregur hann út borðbúnað og skrautmuni frá Ikea.
Í lokin sitja þau öll hamingjusöm að snæðingi.
Auglýsingin fékk strax mikla umfjöllun og gagnrýni og margir lýstu því yfir að hún sýndi mikið kynjamisrétti.
„Þetta mismunar þeim sem eru einhleypir og sérstaklega einhleypum konum. Engin kærasti, þá lítur þín eigin fjölskylda niður á þig, hverskonar gildi á einstakling er þetta að senda?“ segir ein manneskja á síðunni Weibo.
BBC greindi frá því að Ikea hafi dregið auglýsingu sína fljótt til baka og beðist afsökunar á því að hafa sent frá sér röng skilaboð.
„Auglýsingin átti að sýna hvernig Ikea getur hjálpað viðskiptavinum á auðveldan og ódýran hátt að breyta venjulegri stofu í stað til þess að fagna á. Tilgangurinn var að fá viðskiptavini til þess að fagna augnablikum í hversdagsleikanum,“ sagði í afsökunarbeiðni Ikea.
Þrátt fyrir að Ikea hafi dregið auglýsingu sína til baka má enn sjá hluta úr henni víðs vegar um netið.
