Aðdáendur þurfa ekkert að óttast
Hafþór Júlíus Björnsson hefur lýst því yfir að dofi sem hann vaknaði með á hægri hlið andlitsins á þriðjudaginn stafi ekki af neinu hættulegu. Kraftlyftingamaðurinn veiktist allverulega síðastliðinn sunnudag, en fann fyrst fyrir dofatilfinningunni á þriðjudaginn. Þetta kemur fram í facebook-færslu sem Hafþór birti í gær.
Eftir því sem leið á daginn stigmagnaðist dofinn uns öll hægri hlið andlits hans var lömuð. Hafþór gekkst undir ítarlega læknisskoðun í vikunni, sem leiddi í ljós að um lömun af völdum fyrirbærisins Bell’s Palsy væri að ræða.
Einhverjum var brugðið yfir þessum tíðindum og óttaslegnir yfir heilsu Hafþórs, en aðdáendur „Fjallsins“ geta dregið andann léttar núna þar sem kvillinn sem um ræðir varir aðeins tímabundið, eða frá fáeinum vikum upp í nokkra mánuði.
Bell’s Palsy hefur engar verri afleiðingar í för með sér og því mætir Hafþór gallvaskur til keppni á eftir, en í kvöld takast helstu kraflyftingamenn heims á um titilinn Sterkasti maður Evrópu í borginni Leeds, Englandi.
Hafþór tapaði titlinum í fyrra og ætlar að gera allt sem í sínu valdi stendur til að sigra í ár og koma titlinum aftur á Klakann – þar sem hann á heima.
Hann slær á létta strengi í færslu sinni og útskýrir fyrir aðdáendum sem vilja mynda hann á mótinu: „Ég er ekki í vondu skapi, ég get bara eiginlega ekki brosað á myndum“.
