Menn ráku vísast upp stór augu þegar þeir keyrðu fram á skútu sem stödd var á Hafnarfjarðarvegi rétt fyrir klukkan þrjú í dag, enda hálfgerður þorskur á þurru landi, ef svo mætti að orði komast. Þessu greinir fréttaveita Vísis frá. Það var nú ekki svo að skútan hafi strandað á veginum, enda harla ólíklegt. Skútan hafði einfaldlega fallið af kerru bíls við flutning og urðu töluverðar tafir á bílaumferð sökum óhappsins.
Samkvæmt lögreglu urðu engin slys á fólki af völdum óhappsins en mestu tafirnar voru á meðan beðið var eftir að flutningabíll fjarlægði skútuna. Samkvæmt tilkynningu frá lögreglu hefur báturinn nú verið fjarlægður af Hafnarfjarðarvegi og er mönnum auðið að aka eftir Hafnarfjarðarvegi án þess að skúta hindri för.
