„Þvílíkur viðbjóður að þurfa að lifa við svona rugl alla daga.“ Þetta segir Freyja Haraldsdóttir, varaþingmaður Bjartrar Framtíðar, sem gagnrýnir harðlega orð Eddu Björgvinsdóttur, leikkonu.
Edda segir í samtali við Fréttatímann að henni þyki gagnrýni Freyju er varðar heimsókn Guðna Th. Jóhannessonar, forseta Íslands, á Sólheima síðastliðinn þriðjudag til marks um fáfræði.
Edda bendir á að samfélagið á Sólheimum snúist um að viðhalda sjálfstæði og reisn fatlaðra einstaklinga. Þá sé þorpið leiðandi í lífrænni ræktun, sem Edda segir að sé líklega frekar aðdráttarafl gesta heldur en að skoða fatlaða, eins og Freyja segir í viðtalinu. Þá búi enginn á Sólheimum gegn sínum vilja, að sögn Eddu. Þvert á móti sé mikil ásókn í að komast til Sólheima.
Freyja sem brást illa við þessum orðum Eddu og segir á Facebook:
„Ófötluð leikkona sem aldrei hefur reynt fötlunarmisrétti á eigin skinni og þarf ekki á hverjum einasta degi að búa við þann yfirvofandi ótta að verða fyrir fordómum, stimplun og öðru ofbeldi lætur það hvarfla að sé að segja okkur Steinunni vera að misskilja OKKAR EIGIN REYNSLU (þetta krefst caps lock) og OKKAR EIGIN SÖGU.
Freyja bætir við:
„Hvað með konur? Eru þær þá líka fáfróðar og að misskilja kynjamisréttið sem þær verða fyrir? Og hinsegin fólk? Er stoltgangan á morgun bara einhver ruglingur? Eða svart fólk? Er það að misskilja rasisma?“
Að lokum segir Freyja þetta ekki vera í lagi. Langt í frá. „Þvílíkur viðbjóður að þurfa að lifa við svona rugl alla daga.“
