Árni Páll Árnason, formaður Samfylkingarinnar, hefur óskað eftir fundi í stjórnskipunar- og eftirlitsnefnd Alþingis, með umboðsmanni Alþingis, til að fara yfir hæfi forsætisráðherra til að vinna að samningum við kröfuhafa þegar hann sat beggja vegna borðsins.

Þetta kemur fram í pistli sem hann ritaði í Fréttablaðið í dag.

Hann segir að þjóðin þurfi ennfremur að fá skýr svör frá fjármálaráðherra um af hverju forsætisráðherra landsins þurfti ekki að uppfylla neinar trúnaðarskyldur vegna afnámsferlisins, „eða af hverju fjármálaráðherrann krafði hann og aðra þá sem unnið hafa að afnámi hafta ekki um að þeir gerðu grein fyrir hagsmunum sínum af niðurstöðunni,“ bætir Árni Páll svo við.

Þing kemur saman eftir helgi en rétt tæplega fimmtán þúsund manns hafa skrifað undir mótmælaskjal þar sem þess er krafist að Sigmundur Davíð Gunnlaugsson, forsætisráðherra, segi af sér embætti, vegna eignarhaldsfélags eiginkonu hans sem er í skattaskjóli á Tortóla eyju.

Eiginkona Sigmundar átti að auki rúmleg hálfrar milljarða króna kröfu í slitabú bankanna, á sama tíma og Sigmundur vann við að semja við kröfuhafa.