„Hann var með eitthvað sem huldi andlitið“
„Í gærkvöldi varð dóttir mín, 14 ára, fyrir líkamsárás þar sem hún var að labba heim frá því að hitta vinkonur sínar og vini. Þetta var rétt fyrir kl. 23 á leið sem hún er vön að labba ein. Þetta er fjölfarin leið en illa lýst sumstaðar. Það var farið að rökkva og ég hafði hringt í hana uppúr hálfellefu um að fara að koma sér heim. Á leiðinni, þar sem hún er nýbúin að ganga inn Rauðarárstíginn við Klambratún stekkur skyndilega maður aftan að henni, rífur fast í upphandlegginn á henni og grípur fyrir vitin á henni.“
Þannig stöðuuppfærsla sem Sara Stef. Hildardóttir skrifar á Facebook. Þar greinir hún frá óhuggulegri árás sem hún segir að dóttir hennar hafi orðið fyrir. Segir Sara að árásarmaðurinn hafi dregið dóttur hennar aftur á bak inn í runna svo stúlkan missti fótanna. Datt þá stúlkan en Sara segir að maðurinn hafi hlaupið á brott.
„Allt þetta gerist svo hratt og hefur svo lamandi áhrif á hana að það eina sem hún gat gert var að sjá fyrir sér hvað þessi maður gæti hugsanlega ætlað að gera henni; hvernig henni yrði nauðgað þarna eða hreinlega drepin. Hún lamaðist svo af ótta að hún sagðist ekki hafa geta stunið upp orði, hvað þá öskrað. Hún man svo næst þar sem hún rankar við sér í runnanum, staulast á fætur og gengur heim,“ segir Sara og bætir við: „Allan tímann er hún lömuð af ótta um að hann sé kannski á eftir sér. Hún gengur heim stjörf og grátandi og brotnar svo algjörlega niður þegar hún kemur inn í íbúð; náföl, ísköld og þvöl þar sem hún skelfur og titrar öll. Þessi maður sem gerði henni þetta – hann er enn þarna úti. Hann náðist ekki.“
Sara segir einnig í stöðuppfærslunni að hún hafi haft samband við lögregluna sem grandskoðaði staðinn.
„Ég hringdi auðvitað á lögregluna sem var komin til okkar á fáeinum mínútum og var með okkur heillengi á meðan rannsóknarlögreglan kannaði ummerki og lögreglan leitaði mannsins í nágrenninu – manns sem dóttir mín gat samt enga lýsingu gefið á annað en að hann var með eitthvað sem huldi andlitið og var örugglega með hanska.“
Sara hafði samband við lögregluna. Sara tjáir sig í samtali við Vísi:
„Ásetningurinn er klár. Hann er með eitthvað fyrir andlitinu og hann er með hanska. Og hann er enn þarna úti.“
Sara segir stúlkuna í áfalli og vill hún að svæðið verði betur upp lýst. Sara hefur eftir dóttur sinni:
„Ég næ þessu bara ekki úr systeminu á mér, þetta bara er þarna. Út um allt!“
Þá segir Sara ennfremur:
„Þetta er svo óþolandi. Hvað fær menn til að gera svona? Ég er með svo sterka blöndu af reiði og vanmætti núna að það hálfa væri nóg.“
Vegna alvarleika málsins hafði DV samband við lögregluna á höfuðborgarsvæðinu til að fá það staðfest.
Rafn Hilmar Guðmundsson, aðalvarðstjóri á stöð 1, staðfesti að árásin hefði verið tilkynnt til lögreglu síðastliðið sunnudagskvöld. Hann segir að málið sé til rannsóknar. „Við eigum ekki að búa til neitt hræðsluástand. Þetta virðist vera einangrað atvik en við erum að skoða málið.“
Jóhann Karl, aðstoðaryfirlögregluþjónn segir að engar vísbendingar hafi komið fram í málinu. „Við erum engu nær. Við erum útkallsdeildin sem fer á vettvang. Kynferðisbrotadeild sér um rannsókn málsins. Í þessu tilfelli ræddum við við stúlkuna og móður hennar og leituðum þarna í kring. Lögreglumenn eru núna meðvitaðir um árásina og svæðið er vaktað,“ segir Jóhann Karl og bætir við.
„Við vitum ekki hvort maðurinn geri þetta aftur á nákvæmlega sama stað, annars staðar í borginni, eða hvort hann geri þetta yfir höfuð aftur. Ég get því miður ekkert sagt til um það.“
Jóhann Karl bendir á að málið sé rannsakað sem einstakt tilfelli. Hann líkt og Rafn segir að engin ástæða sé til að vekja upp hræðslu meðal almennings vegna málsins.
Gunnar Rúnar Sveinbjörnsson, upplýsingafulltrúi lögreglunnar á höfuðborgarsvæðinu, hafði ekki heyrt af málinu þegar DV hafði samband.
