Ástandið í Grenlæk í Vestur-Skaftafellsýslu hefur batnað til muna og er vatnið í læknum að aukast með hverjum deginum sem líður. Ástæðuna fyrir auknu vatnsrennsli má rekja til leyfis sem Orkustofnun veitti fyrir tveimur vikum síðan um að rjúfa varnargarða til að bregðast við bráðavanda en nánast ekkert vatn var eftir í læknum. DV fjallaði í síðasta mánuði ítarlega um málið

Hörður Davíðsson á Hótel Laka í Efri Vík, sem var í hópi þeirra sem börðust hvað harðast fyrir því að fá aukið rennsli í Grenlæk, segir allt annað líf að færast í lækinn. Hann er himinlifandi með lausnina sem fékkst og þakkar það ekki síst þá umfjöllun sem málið fékk í fjölmiðlum.

Allt smám saman að færast í fyrra horf

„Þeir sem unnu þessa orrustu er náttúran sjálf, almenningur og fjölmiðlar. Orkustofnun tók við sér og gerði það með glæsibrag. Þetta er engu að síður langhlaup en grunnvatnsstaðan sem var komin niður í 5-6 metra í Landbrotshrauninu hefur hækkað um 1,5 metra síðan opnað var fyrir aukið vatnsrennsli. Það er hækka um 7-8 cm í læknum á dag svo þetta er allt í rétta hátt og búið að forða læknum frá frekara tjóni. Það er mikilvægt að flugan nái að verpa í lækina fyrir kviðpokaseiðin að ári. Það er bara gott hljóðið í okkur, sjóbirtingurinn er genginn og er að bíða eftir því að komast á hrygningarstöðvarnar. Auðvitað vantar töluvert upp á vatnsmagnið sé orðið eðlilegt í Grenlæk. Það vex með tímanum og rennslið er með ágætum. Það er allt smám saman að færast í fyrra horf,“ sagði Hörður Davíðsson.

Leyfið sem Orkustofnun veitti gildir til 15. ágúst en menn á svæðinu vonast að framlenging verði veitt. Annars fer allt í fyrra horf sem menn vilja eftir fremsta megni forðast.