Íslenski Eurovision-hópurinn er kominn til Stokkhólms
Eins og vant er á þessum árstíma bíður stór hluti þjóðarinnar í ofvæni eftir Söngvakeppni evrópskra sjónvarpsstöðva.
Íslenski hópurinn, með söngkonuna og lagasmiðinn Gretu Salóme í fararbroddi, er nú þegar kominn til Stokkhólms.
Blaðakona DV náði tali af Felix Bergssyni sem er aðstoðaryfirmaður sendinefndarinnar að þessu sinni. „Við erum í góðum fíling hér í sólinni í Stokkhólmi. Það er allt að gerast,“ segir Felix, en í sendinefndinni eru um 20 manns, listamenn, aðstoðarfólk og starfsmenn RÚV.
Felix segir hópinn eiga mikla vinnu fyrir höndum. „Við vorum ekki alveg ánægð með það sem Svíarnir ætluðu að bjóða okkur upp á í sviðsetningunni, svo það var nauðsynlegt að spóla aðeins til baka og finna réttu lausnirnar, en núna er þetta farið að líta mjög vel út.“ Hópurinn á þó mikla vinnu fyrir höndum. „Þetta er eins og að setja upp leikrit. Það koma augnablik þar sem maður heldur að verkið komist aldrei á svið, og jafnvel að maður muni aldrei vinna framar. En svo smellur þetta allt að lokum.“
Fyrsta æfing á atriðinu fer fram á sviðinu í tónleikahöllinni Globen í dag, en undanúrslitakeppnin er haldin 10. maí. „Greta keppir svo í úrslitakeppninni þann 14. maí,“ segir Felix og hljómar sigurviss. „Við erum öll mjög bjartsýn þó svo að veðbankar spái því að við rétt skríðum upp í úrslitin. Undanfarin ár hafa þeir verið sannspáir um fimm efstu sætin, en lítið að marka eftir það.“
Felix segir einvalalið mynda íslenska hópinn. „Við erum auðvitað miklu fámennari en hóparnir frá flestum öðrum þjóðum. Ég held til dæmis að Rússarnir séu með um 50 manns á svæðinu. En hér er valinn maður í hverju rúmi. Greta er eins og nagli, og svo eru hér reynsluboltar á borð við Pétur Örn, Þorvald Bjarna, Kristján Gísla og svo auðvitað Gísli Marteinn, sem mun lýsa keppninni í beinni.“
Felix Bergsson mun flytja fréttir af ævintýrum hópsins á samfélagsmiðlum. Hann mun birta myndir og myndbönd daglega og gefa fólki færi á að skyggnast inn í undirbúninginn á bak við atriðið og það sem gerist baksviðs. Felix má finna á Twitter: @felixbergsson og á Facebook: https://www.facebook.com/bergssonfelix
