Portúgalski bardagakappinn João Carvalho keppti síðastliðið laugardagskvöld við Charlie Ward á Alþjóðaleikvellinum í Dublin. Eftir að hafa tapað þremur lotum féll hann í jörðina tuttugu mínútum eftir síðustu lotuna og var fluttur á sjúkrahús.

Charlie Ward, íslenski bardagakappinn Gunnar Nelson og Conor McGregor eiga það allir sameiginlegt að hafa hlotið handleiðslu John Kavanagh, en hann sendir Carvalho og fjölskyldu hans samúðarkveðju á Facebook.

Í samtali við DV segir Haraldur Nelson, pabbi Gunnars, að Gunnar og Ward hafi æft saman og kannist hvor við annan. Haraldur segir slysið vera mjög sorglegt, líkt og öll slys sem verða.

„Dauðsfallið er það fyrsta sem verður á um tuttugu ára ferli MMA í Evrópu,“ segir Haraldur í samtali við blaðamann. Hann segist spyrja sig að því hvort kannski hafi verið um undirliggjandi veikleika að ræða. Slíkt sé ekki hægt að vita nema með miklu eftirliti og vísar til þess þegar Gunnar var sendur í heilaskanna þegar hann keppti í UFC.

„Ég hef ekki séð bardagann sjálfur, en þeir sem hafa séð hann segjast hafa séð verri höfuðhögg en þarna voru látin dynja. Maður veit ekki hvað það er sem gerist,“ segir Haraldur að lokum.

“Andlátstilkynning:
Nobrega liðið staðfestir að João Carvalho, einn okkar liðsmanna, lést í gærkvöldi á Baumont sjúkrahúsinu í Dublin, kl. 21.35.

Það er með mikilli sorg sem við ritum þessi orð, en João lést eftir að tvísýnt var um líf hans í 48 stundir. Á TEF MMA mótinu sem haldið var á laugardag á National Boxing leikvanginum í Dublin, var farið eftir öllum öryggisreglum, og eftir bardagann voru viðbrögð rétt og samkvæmt reglum.

João leið illa um 20 mínútum eftir að bardaganum lauk. Læknateymi aðstoðaði hann strax á staðnum, og hann var síðan fluttur í flýti á Beumont sjúkrahúsið, þar sem hlúð var að meiðslum hans í skurðaðgerð á heila.
Eftir aðgerðina var João ennþá í lífshættu allt þar til hann var úrskurðaður látinn á mánudag kl. 21.35.

Andlát João er harmleikur, þrátt fyrir að læknirinn sem tengdist mótinu hefði fylgt honum eftir, stuðning írsku þjóðarinnar, sem við metum mikils á þessum erfiðu tímum, og þó að áhættan sem fylgir íþróttinni sé vel þekkt.
Bæði fjölskylda hans og liðsfélagar eru harmi slegin, en hann hafði fylgt Nóbrega liðinu á ferli sínum bæði heima og erlendis. Með sorg í hjarta sendum við fjölskyldu João innilegar samúðarkveðjur, og sömuleiðis öllu Nobrega liðinu.“

[youtube https://www.youtube.com/watch?v=Lp0brVc1094&w=1000&h=563]