Konan, sem er kennari í New Jersey, var að öskra á tvo drengi fyrir að brjóta reglur um samkomubann. Strákarnir voru að spila fótbolta í almenningsgarði.
Konan var úti að ganga með hund sinn þegar hún sá þá og ákvað að segja þeim til syndanna.
„Þið eruð ástæðan fyrir því að við séum í þessum aðstæðum. Þið eruð vandamálið, ekki lausnin. Haldið áfram að taka upp. Hverjum ætlið þið að sýna þetta? Deilið þessu á samfélagsmiðla. Þið eruð hálfvitarnir fyrir að gera rangt. Ég er bara að reyna að bjarga rassgatinu ykkar og lífi ykkar. En ókei, deyið bara. Ég vona að þið fáið báðir kórónuveiruna. Ég vona að þið deyið báðir hægum og kvalafullum dauða,“ öskrar konan.
Sjáðu myndbandið hér að neðan.
Samkvæmt The Trentonian er konan stærðfræðikennari við Steinert-skólann í New Jersey. Hún býr nálægt almenningsgarðinum og þetta var ekki í fyrsta skipti sem hún lætur fólk heyra það fyrir að brjóta reglur um samkomubann.
Drengirnir viðurkenna að þeir hefðu ekki átt að vera í garðinum en eru hissa að kennarinn hafi óskað þeim dauða.
„Ég var í sjokki þegar hún sagði þetta. Ég vissi ekki að einhver gæti sagt svona, hvað þá kennari,“ sagði einn drengjanna.
Kennarinn er nú undir rannsókn fyrir ummæli sín. Borgarstjórinn Jeff Martin segist ekki hafa séð myndbandið en fordæmir hegðun hennar samt sem áður.
„Enginn ætti að óska öðrum skaða. Þetta er mjög alvarlegt. Það hafa allavega 50 borgarbúar látist úr þessu, 50 fjölskyldur sem þjást. Þetta er ekkert til að grínast með. Kennari eða ekki, það er ekki í lagi.“
