Ellen DeGeners er vön að gefa áhorfendum í sal gjafir þegar nálgast jólin. Hún kallar það „Greatest Nights of Giveaways“ og var fyrsta kvöldið í gær. Hún fékk leikkonuna Jennifer Aniston til að hjálpa sér og er óhætt að segja að þetta hafi verið mjög tilfinningaríkur þáttur. Daily Mail greinir frá.

Jennifer brotnaði niður þegar hún horfði á myndband af dóttur grátbiðja Ellen um að hjálpa atvinnulausum föður hennar.

Áhorfandinn Elyse Kimball gerði myndbandið um föður sinn, Jeff, sem missti eiginkonu sína úr krabbameini þegar dætur þeirra voru ungar.

„Hann hefur gefið okkur fjölskyldunni allt. Hann á þetta ekki skilið,“ sagði Elyse í myndbandinu.

„Hann er það eina sem ég á. Hann er líf mitt. Hann er það sem kemur mér í gegnum það góða og það slæma. Í eitt skipti þá langar mig að gefa honum eitthvað. Ég vil að hann fái eitthvað sem hann á skilið, og ég get ekki gert það án þess að fá hjálp.“

Ellen kom fjölskyldunni á óvart með því að senda upptökuhóp til þeirra, og þóttist vera að gera þátt um fólk sem snýr lífi sínu við. Jeff segir frá því hvernig það var að missa eiginkonu sína þegar Elyse var aðeins 3 ára og systir hennar Lexi var 5 ára.

Þau þrjú voru í salnum í þættinum og bauð Ellen þau velkomin á sviðið.

Ellen sagði þeim að þau hefðu skreytt húsið þeirra, sett gjafir undir jólatréð og skipt út gömlum húsgögnum fyrir ný.

Jennifer gaf síðan fjölskyldunni Eiffel-turna jólaskraut, en það hafði verið langþráður draumur móður stúlknanna að fara til París. Ellen sagði þeim að hún ætlaði að senda þau í frí til borgarinnar. En þau færu einnig til Ítalíu og Grikklands.

„Þið farið í ferðalag um Evrópu í mánuð,“ sagði Ellen. Síðan spilaði fjölskyldan leik og fékk hvert þeirra Visa kort með rúmlega sex milljón króna innistæðu.