Áhrifavaldurinn Þórunn Sigurborg Ívarsdóttir og eiginmaður hennar, Harry Sampsted, settu nýverið íbúð sína á Holtsvegi í Garðabæ á sölu. Það eru því mikil tímamót í lífi þeirra og álagstími í vændum. Því fannst DV tilvalið að lesa í stjörnumerkin og sjá hvernig þau Þórunn og Harry eiga saman.
Þórunn er meyja en Harry er bogmaður. Þegar þessi tvö merki koma saman í ástarsambandi verður sambandið afskaplega heilsteypt og sterkt. Bogmaðurinn elskar að kanna nýjar slóðir og vera meðal fólks og meyjan hefur unun af því að greina allar uppgötvanir bogmannsins í öreindir. Bæði merkin hafa gaman af því að tala saman um allt milli himins og jarðar og þó að meyjan fari oft fram á að bogmaðurinn sé jafn mikill fullkomnunarsinni og hún sjálf þá læra þau að meta kosti og galla hvort annars með tímanum.
Oft getur verið erfitt fyrir bogmanninn að sætta sig við raunsæi meyjunnar og meyjan á stundum í mestu vandræðum með að halda í við orkuna sem flæðir innra með bogmanninum. Þau vega hins vegar hvort annað upp. Meyjan býður bogmanninum upp á öryggi og traustan grunn til að láta drauma sína rætast á meðan bogmaðurinn kryddar sambandið með nýjum ævintýrum.
Það má í raun segja að meyjan elski að fara ofan í hvert einasta smáatriði á meðan bogmaðurinn sér frekar heildarmyndina. Þannig eiga þau vel saman, þessar andstæður, og ná að velta upp öllum hliðunum á teningnum. Ástin er sterk og hrein og litlir árekstrar ná ekki að skemma þá djúpu tengingu sem bogmaðurinn og meyjan mynda.
Þórunn Ívars
Fædd: 4. september 1989
Meyja
-trygg
-góðhjörtuð
-vinnusöm
-hagsýn
-feimin
-of gagnrýnin
Harry
Fæddur: 10. desember 1980
Bogmaður
-örlátur
-góð kímnigáfa
-heiðvirður
-ævintýragjarn
-óþolinmóður
-lofar upp í ermina á sér
