Fyrirsætan Bryndís Líf hefur notið gríðarlegra vinsælda á samfélagsmiðlum undanfarið og hafa ögrandi myndir hennar vakið athygli. Bryndís birtir oftar en ekki myndir af sér fáklæddri og er ötull talsmaður „free the nipple“ hreyfingarinnar. DV fannst því tilvalið að leggja tarotspil fyrir Bryndísi og sjá hvað framtíðin ber í skauti sér. Lesendum er bent á að þeir geta sjálfir dregið sér tarotspil inn á dv.is.
Fyrsta spilið sem kemur upp hjá Bryndísi er Töframaðurinn. Það túlkar persónu Bryndísar en hún sækir sinn andlega og líkamlega mátt bæði til æðri máttarvalda og úr umhverfi sínu. Þetta gerir hún alveg ómeðvitað og er orkuflæði Bryndísar mikið um þessar mundir. Innra með henni er mikill neisti og hún lætur gagnrýni ekki á sig fá. Hún veit hvað hún vill og stefnir ótrauð að markmiðum sínum. Hún er sjálfsörugg, skipulögð og örugg kona en jafnframt mjög hæf í mannlegum samskiptum. Það mun koma henni langt. Máttur Bryndísar á sér engin takmörk og hún ætti að einbeita sér að því að koma hugmyndum sínum í verk.
Næst er það 5 mynt. Það er eitt sem hefur hindrað Bryndísi í að láta alla drauma sína rætast og það eru áhyggjur tengdar fjárhagnum. Hugsanlega gæti atvinnuleysi verið að hrjá hana en þessi fátækt gæti hins vegar einnig verið tengd andlegum málum. Bryndís þarfnast mikillar ástar og umhyggju um þessar mundir en hún þarf að vara sig á því að leita að því í örmum annarra. Fyrst og fremst þarf hún að einbeita sér að sjálfinu. Með því að gera það finnur hún ný tækifæri í framtíðinni og öðlast skilning á tilgangi lífsins. Þessar áhyggjur sem hún hefur haft undanfarið verða fljótt á bak og burt. Hjálpin er nær en henni grunar og vandamálin leysast skjótt með jákvæðu viðhorfi og óbilandi bjartsýni.
Loks er það Stafaás en það spil táknar að Bryndís finnur fljótlega sína fjöl. Innblástur, sköpunargáfa, spenna, metnaður og vilji til að framkvæma hugmyndir sem Bryndís hefur eflt innra með sér lengi vel birtist samhliða spili þessu. Hér er aðeins eitt sem kemur til greina og það er upphaf á einhverju stórkostlegu sem Bryndís leggur metnað sinn í og ekki síst sköpunarkraft sem fyllir hana lífi og vilja til að skara fram úr. Þessi nýi kafli í lífi Bryndísar færir henni fjárhagslega öryggið sem hún hefur þráð en ekki síður andlegt öryggi.
