Raunveruleikastjörnurnar Kourtney Kardashian og Scott Disick hönnuðu og byggðu leikhús (e. playhouse) fyrir börnin sín. Já heilt hús þar sem börnin þeirra þrjú geta leikið sér. Þau eiga saman Mason, 10 ára, Penelope, 7 ára, og Reign, 4 ára.

Kourtney sýnir leikhúsið í nýju myndbandi fyrir Arcitectural Digest.

„Ég hef verið að tala um að búa til leikhús fyrir börnin síðan Mason var mjög ungur,“ sagði Kourtney.

Kourtney segist hafa eytt nokkrum árum í að skoða bloggsíður í leit að innblæstri fyrir hönnunina og að setja saman möppu með uppáhalds hugmyndum sínum.

„Ég gat ekki ákveðið mig,“ segir Kourtney og þá ákvað Scott, barnsfaðir hennar, að taka við keflinu.

„Níu árum síðar var Scott alveg: „Jæja ég tek núna yfir og ætla að byggja leikhús handa krökkunum,“ segir Kourtney.

Þau byggðu leikhúsið heima hjá Kourtney, en hún og Scott eru skilin. Þau fengu krakkana til að hjálpa sér að ákveða nokkur smáatriði.

Börnin þurfa að fylgja einni reglu þegar þau eru í leikhúsinu, en engin tækni er leyfð.

„Það eru engir iPads, símar, tölvur, leiktæki, sjónvörp – ekkert er leyft inni,“ segir Kourtney.

„Það er ástæðan fyrir því að við erum með margar bækur.“

Horfðu á Kourtney sýna leikhúsið í myndbandinu hér að neðan.