Fegurðardrottningin Hildur María Leifsdóttir bar sigur úr býtum í fegurðarsamkeppninni Miss Universe Ísland árið 2016. Í YouTube-myndbandi fer hún ítarlega yfir þann draum sem hún hefur lifað eftir að hún hampaði kórónunni. Nú stendur yfir leit að keppendum í Miss Universe Ísland, en fegurðarsamkeppnin verður haldin síðar á þessu ári.

https://www.instagram.com/p/BsLnTjWgF1S/

Umdeild regla

Meðal inntökuskilyrða í keppninni er að keppendur þurfa að vera ógiftir og barnlausir. Hildur María segir þetta vera reglur frá Miss Universe Organization, ekki íslensku keppninni, og útskýrir hún nánar af hverju reglurnar eiga rétt á sér.

„Ástæðan fyrir þessum reglum er bara mjög einföld þegar þú veist hvernig Miss Universe-keppnin er. Sigurvegari Miss Universe-keppninnar flytur rakleiðis til New York. Hún er að ferðast út um allan heim í heilt ár. Það er bara ekki talið að einstaklingur sem á börn eða er gift geti bara gert það og er tilbúinn til að gera það og að segja bless við fjölskylduna og fara út að ferðast í heilt ár,“ segir Hildur María.

https://www.instagram.com/p/BelUa4vB1sy/

„Ég var bara föst í sama farinu“

Það var í raun einskær tilviljun að Hildur María tók þátt í keppninni, en hún starfaði sem flugfreyja þegar henni bauðst þetta tækifæri.

„Það er eiginlega hálf magnað að sjá hve mikið ég hef mótast á síðustu tveimur árum,“ segir Hildur María. „Ég fékk boð um að taka þátt. Ég var ekki tilbúin til þess. Ég hélt að ég myndi ekk itaka þátt. Það var ekki fyrr en á seinasta degi, sama dag og lokað var fyrir umsóknir að ég heyrði í Manúelu og ákvað að slá til. Ég hugsaði bara: Af hverju ekki?“ bætir hún við. „Ég var bara föst í sama farinu. Ég var til í að prufa eitthvað nýtt.“

Hildur María segir að þátttöku í keppninni fylgi ekki strangar reglur um undirbúning og að ekki séu gerðar kröfur til þess að þátttakendur líti út á vissan hátt. Hún segir meira lagt upp úr persónuleika og innri fegurð.

„Þetta er svo miklu meira en að fara upp á svið á bikiníi,“ segir hún og bætir við að hún telji ástæðuna fyrir því að hún hafi sigrað að lokum hafi verið að hún stóð sig afar vel í dómaraviðtölunum.

https://www.instagram.com/p/BsoCDrpA-IZ/

„Besta ákvörðun sem ég hef tekið í mínu lífi“

Hildur María segir keppnina hafa breytt lífi sínu.

„Án þess að ýkja þá er þetta besta ákvörðun sem ég hef tekið í mínu lífi,“ segir hún. „Þegar ég vann keppnina þá hætti ég að fljúga og ég er bara búin að vera lifa draumnum í núna tvö ár. Þetta byrjaði allt saman bara þegar að ég ákvað að taka þátt í Miss Universe Ísland,“ bætir hún við. Fegurðardrottningin bjó á Cayman Islands í eitt og hálft ár en er nýflutt aftur til Íslands. Hún hvetur aðrar konur til að taka þátt í Miss Universe Ísland.

„Ef þig langar að taka þátt, plís taktu þátt. Ekki hugsa endalaust um hvað öðrum finnst.“

Myndband Hildar Maríu í heild sinni má sjá hér fyrir neðan:

https://www.youtube.com/watch?v=rKNVJiivXb0&feature=youtu.be