Mig langar að deila með ykkur uppskrift af spínat lasagna sem ég elska. Það er ótrúlega gott og hollt.
Þegar mamma bauð okkur Arnóri fyrst í spínat lasagna hugsaði ég með mér bara ,,Já ok, en hrikalega óspennandi” en vá hvað það kom á óvart og er nú einn af mínum allra uppáhalds réttum!
Það er alveg frekar einfalt að búa réttinn til og einnig gaman, svo tekur það alls ekki langan tíma sem mér finnst alltaf plús.
Það sem þarf:
1 púrrulaukur
C.a. 10 stk meðalstórar kartöflur
600gr frosið spínat
Lasagna plötur
200 gr rjómaostur
Rifinn ostur
Hvítlaukssalt
1-2 msk kúmín (cumin)
1 tsk kóríander
Dass af chillidufti
Salt & pipar
Aðferð:
Leggja lasagna plöturnar í bleyti í c.a. 30 mín til að mýkja þær aðeins
Sjóða kartöflur (ekki kæla)
Saxa lauk og steikja upp úr olíu
Setja spínat á pönnuna með lauknum
Setja grófmarðar kartöflur út á laukinn og spínatið þegar spínatið hefur þiðnað á pönnunni
Rjómaost og kryddi er svo bætt út í og allt hrært vel saman
Síðan er þessu komið í eldfast fót, gerðar eru nokkrar hæðir og lasagna plötunum raðað á milli.
Að lokum er settur ostur ofan á og eldað í ofninum í c.a. 40 mín á 180 gráðum.
Borið fram með hvítlauksbrauði og gulum baunum (ég kaupi frosnar baunir, sýð þær og blanda svo smjöri og salti út í eftir að ég tek vatnið frá, mæli með!)
Hægt er að fylgjast með Tinnu á Snapchat undir notandanafninu: tinnzy88
Færslan birtist upphaflega á Fagurkerar.is
