Þjóðhátíðargestir skemmtu sér konunglega í gærkvöldi í Herjólfsdal. Formaður Þjóðhátíðarnefndar þakkar heimafólki fyrir að hafa slegið velferðarskjaldborg yfir gesti eftir slagviðri sem gekk yfir á föstudagskvöldið.

Meðal annars þurfti að hætta við að kveikja í brennu á Fjósakletti vegna veðurs á föstudag, fella þurfti stóra tjaldið og hvítu tjöldin í framri hluta Herjólfsdals voru rýmd í öryggisskyni. Viðbragðsáætlun var virkjuð um kvöldið og Herjólfshöllin opnuð fyrir gesti.

Jónas Guðbjörn Jónsson, formaður Þjóðhátíðarnefndar, þakkar sömuleiðis gestum fyrir þrautseigju.

„Það var stórkostlegt að sjá brekkuna lifna við í gærkvöldi. Nú höldum við ótrauð áfram inn í síðasta daginn af þessari Þjóðhátíð sem nú þegar hefur skrifað sig á spjöld sögunnar. Ég má til með að ítreka þakkir til allra gestanna fyrir þrautseigju og allra Vestmanneyinganna sem slógu velferðarskjaldborg yfir gestina okkar í gær og fyrri nótt.“

Tónlistardagskráin á stóra sviðinu hófst með VÆB-bræðrum. Næst steig Stuðlabandið á svið með Röggu Gísla, Selmu Björns og Friðriki Ómari. Hápunkturinn á stóra sviðinu voru svo tónleikar Herra Hnetusmjörs og í framhaldinu stigu FM95Blö-menn á stokk ásamt Jóhönnu Guðrúnu og lokatónleikarnir voru með Aron Can.

Veislan heldur áfram í kvöld. Stuðlabandið hefur sett saman kvölddagskrá með Stefáni Hilmarssyni, Siggu Beinteins, Emmsjé Gauta, GDRN og goðsögninni Björgvini Halldórssyni. Síðan tekur Brekkusöngurinn við undir handleiðslu Magnúsar Kjartans. Loks verður brennan tendruð, blysin verða á sínum stað og tónlistin heldur svo áfram fram undir morgun.

Herjólfur tilkynnti svo í morgun að siglingar í Landeyjahöfn hæfust aftur frá og með 5:30 í morgun.