Þar segir hann frá því hvernig tiltölulega einföld æfing – sem flestir geta gert, sama á hvaða aldri þeir eru – getur skipt sköpum í baráttunni gegn hættulegum lífstílssjúkdómum.
Það vita það flestir að regluleg hreyfing getur dregið úr líkum á hjarta- og æðasjúkdómum, heilablóðfalli, sykursýki af tegund 2 og ákveðnum tegundum af krabbameinum.
Mæla heilbrigðisyfirvöld almennt með því að fullorðnir séu líkamlega virkir á degi hverjum og stundi að minnsta kosti 150 mínútur af blandaðri þol- og styrktarþjálfun á viku.
Hjartalæknirinn Yaranov segir að maðurinn sé í raun með tvö hjörtu, annað í brjóstinu og hitt í kálfunum. Þó vissulega sé um mikla einföldun að ræða segir Yaranov að kálfavöðvarnir gegni gríðarlega mikilvægu hlutverki fyrir blóðrásina.
Með hverju skrefi og hverri kálfalyftu sé blóðinu pumpað til baka til hjartans og þetta geti komið í veg fyrir myndun blóðtappa.
Þess vegna segir Yaranov að göngutúrar séu eitt það besta sem hægt er að gera. Hann bendir á að nútímamaðurinn sitji mikið, jafnvel klukkustundum saman, og gangi miklu minna en áður. Þá minnki vöðvamassinn okkar eftir því sem við eldumst.
„Þegar þetta „annað hjarta“ okkar í kálfunum veikist þarf hið raunverulega hjarta að vinna mun meira. Þá hægist á blóðrásinni, fætur byrja að bólgna, blóðþrýstingur hækkar og hættan á hjartabilun margfaldast,“ segir hann.
Rannsóknir hafa sýnt að 10 þúsund skref á dag geti minnkað líkur á hjarta- og krabbameinum og ótímabærum dauðsföllum. Aðrar rannsóknir benda þó til að jafnvel 7 þúsund skref á dag geti skilað verulegum árangri, og að gönguhraðinn skipti ekki síður máli.
Nýleg bandarísk rannsókn, sem náði til tæplega 80 þúsund einstaklinga, sýndi að stuttur en kröftugur göngutúr var betri fyrir heilsuna en löng ganga á hægari hraða.
„Það skiptir máli að hreyfa sig daglega,“ segir Yaranov. „Farðu í göngutúr, lyftu hælunum við skrifborðið, taktu stigann í stað lyftunnar og haltu kálfavöðvunum sterkum. Byrjaðu í dag – þú munt þakka þér fyrir það þegar þú eldist.“
