Hjálmar Örn Jóhannesson, skemmtikraftur með meiru, létti á sálu sinni þegar hann játaði á sig gömul bernskubrek. Hann og vinkona hans, Eva Ruza, ræddu málið í þætti þeirra Helgarvaktin á K100 nýlega.
„Þú ert búin að játa, ætlar að selja treyjuna hans [maður Evu] ef við getum fengið peninga. Hvað er að gerast? Með bensínbrúsa út í bíl, maður veit ekki hvað hefur gerst í þessu sumarfríi hjá þér,“ segir Hjálmar Örn við Evu.
„Hjálmar, við getum ekki rætt þetta aftur út af því að síðasti þáttur fyrir sumarfrí kom á DV með rúðurnar og löggumálið. Hvað heldurðu að fólk haldi um mig?“ svarar Eva.
Eva spyr hvort Hjálmar Örn hafi ekkert gert sem krakki sem hafi verið vafasamt. Hann er ekki lengi að svara og segist einu sinni hafa kveikt í sinu.
„Rétt hjá Fylkisvellinum. Ég fékk í hendurnar eldspýtur mjög óvænt og var bara einn.
Og er eins og alltaf þarna allt sumarið og allt úti í fótbolta. Allir alltaf úti í fótbolta. Svo bara fótboltinn búinn og ég er á leiðinni heim. Ég var bara einn. Ég kveiki í smá hérna, bara til að sjá svona. Svo slekk ég bara strax, hugsaði ég. Og ég ætlaði að gera það, bara rétt að sjá þetta brenna, þú veist. Ég var með þessar eldspýtur. Þetta er bara ágætis forvörn þessi saga.“
Verr fór þó en Hjálmar Örn ætlaði. Segist hann strax hafa kviknað í á fullu og hann ekki ráðið við neitt.
„Það var svo þurrt grasið og ég fer bara úr treyjunni og byrja bara að slá og reyna að slökkva á fullu og stappa á fullu. Og það kemur eitthvað fólk hlaupandi að. Og ég bara er á fullu þarna að slá og stappa. Og þeir spyrja hvort ég hafi séð hver gerði þetta. Ég sagði nei. Ég er bara að reyna að slökkva þetta. Og var hampað sem hetju.“
Segir hann marga hafa komið að og náðst hafi að slökkva sinubrunann sem var á nokkuð stóru svæði. Hann hafi síðan komið heim skítugur, lyktandi af reyk og í brunnum galla. Móðir hans hafi eðlilega spurt hvað kom fyrir og Hjálmar Örn sagðist hafa komið að og reynt að slökkva sinubrunann.
„Og mamma trúði mér alltaf en systir mín, hún fattaði að þetta var ég. Hún var viss um að þetta var ég, hún sagði þetta varst þú, þú kveiktir í. Ég hef ekki enn játað. En ég geri það í dag, ég hugsa að það séu fjörutíu ár síðan þetta var.“
Hlusta má á spjall þeirra vina í heild sinni hér.
