Fjölmargir þjást af frjókornaofnæmi yfir sumartímann sem getur valdið ertingu í augum og nefjum. En ofnæmisviðbrögðin geta gert vart við sig víðar á eða í líkamanum.

Daily Mail birti í vikunni umfjöllun þar sem fjallað var um að konur gætu fundið fyrir kláða og óþægindum í og við píkuna vegna slíks ofnæmis. „Leggöngin eru með slímhúð líkt og nef og augu og geta brugðist við loftbornum ofnæmisvöldum eins og frjókornum,“ er haft eftir Dr. Tania Adib við Lister-sjúkrahúsið í London.

Þetta hafi verið lítið rætt hingað til og einkennin iðulega ranglega greind sem sveppasýking. Rannsóknir sýna þó að allt að 44% kvenna sem fá ofnæmisviðbrögð í leggöngum eru með ofnæmi fyrir frjókornum – ýmist vegna beinar snertingar við húð eða í gegnum öndun.

Einkenni eru svipuð og við sveppasýkingu: kláði, sviði og bólga. Læknar hvetja konur til að leita til læknis ef þessi einkenni koma aftur og aftur á sama tíma og frjókornamagn er hátt – sérstaklega ef sveppapróf reynast neikvæð.

Meðferð getur falið í sér ofnæmistöflur og að forðast ertandi efni. Þá getur ofnæmislyfjameðferð jafnvel dregið úr bæði öndunar- og leggangaeinkennum.