Gagnrýnandinn Jón Viðar Jónsson kemur með mikilvægt innslag í umræðuna um þá alvarlegu stöðu sem upp er komin á Alþingi. Líklega er nokkuð til í færslu sem Jón Viðar birti í kvöld á Facebook því besta útspilið gegn alvöru er að sjálfsögðu gaman.

„Þær stundir koma að við hljótum að sakna Spaugstofunnar. Vissulega voru þeir orðnir ansi lúnir og oft hálfframlágir, félagarnir, en þeir fóru með himinskautum í beittum pólitískum húmor þegar best lét og þeir fengu gott efni í hendur.“

Jón Viðar er sannfærður um að félagarnir hefðu getað gert aðstæðunum á Alþingi í dag góð skil.

„Og það er synd að þeir eða þeirra líkar skuli nú ekki vera á svæðinu til að gera óstandinu í Alþingi verðug skil. Við eigum ýmsa góða húmorista, en þeir eru ekki í Ríkisútvarpinu og leggja ekki heldur rækt við þá pólitísku satíru sem þjóðin þarf nú – og svo sem alltaf – sárlega á að halda.“