Leikkonan Aimee Lou Wood rýfur þögnina um samstarfið með Walton Goggins í þriðju þáttaröð af White Lotus.

Það hefur verið hávær orðrómur á kreiki um að það hafi kastast í kekki milli þeirra og þau talist ekki við.

Aðdáendur þáttanna láta ekkert fram hjá sér fara og tóku eftir því að leikararnir voru ekki lengur að fylgja hvort öðru á Instagram eftir að þáttaröðin lauk göngu sinni. Svo virðist sem Walton hafi blokkað Aimee þar sem ummæli hennar við fyrri færslur hafa horfið af síðunni hans, á meðan hans birtast enn á hennar. Sögusagnirnar fóru enn frekar á flug þegar þau hvort um sig deildu sinni persónu úr þáttunum á samfélagsmiðlum án þess að merkja hvort annað í færslurnar.

Sjá einnig: Kastaðist í kekki á milli White Lotus parsins?

Margir bíða forvitnir eftir að vita hvað kom upp á, eða hvort eitthvað hafi yfirhöfuð komið upp á.

Aimee rauf þögnina um samstarfið með Walton á Met Gala á mánudagskvöldið. Hún var spurð hvort hún myndi mæta sem óvæntur gestur í Saturday Night Live á laugardaginn næstkomandi, en þá verður Walton Goggins kynnir í vinsælu þáttunum. Aimee sagðist ekki ætla að gera það en að hún væri spennt að sjá Walton í þessu hlutverki.

„Ég elskaði að vinna með Walton, það var best í heimi,“ sagði hún við Entertainment Tonight.

„Hann verður frábær í SNL. Þetta er fullkomið fyrir hann. Þetta verður svo fyndið, ég er spennt að sjá það.“

Það var greint frá því fyrir stuttu að Walton hafi verið búinn að samþykkja að vera gestakynnir áður en umdeildi brandarinn um Aimee fór í loftið í apríl. Grínistinn Sarah Sherman hermdi eftir Aimee og var með gervitennur, grínið sneri að framtönnum Aimee og var ýjað að því að leikkonan vissi ekki hvað flúor væri.

Sjá einnig: Brotnaði niður á götum London eftir „ljótan“ brandara SNL

Byrjuð að fylgja hvort öðru

Leikararnir komu aðdáendum aldeilis á óvart í vikunni þegar þau byrjuðu að fylgja hvort öðru á samfélagsmiðlum og vona að stríðsöxin sé grafin.