Ragnhildur er sálfræðingur með áherslu á heilsusálfræði og lærður einkaþjálfari.
Hvað er manneskjugeðjun?
„Manneskjugeðjun er varnarviðbragð sem veitti okkur öryggi í fyrri samböndum. Til dæmis ef þú ólst upp á heimili þar sem þagnarbindindi, fýlustjórnun, reiðiköst voru normið. Ef þú fékkst þögn, hunsun, augnarúll og andvörp þá var hríslandi kvíði og óþægindi. Ef einhver var fúll, reiður, önugur, gramur, pirraður var óöryggi í sálinni. Þá púllaðirðu trúðinn til að kæta og gleðja. Ef allir voru glaðir þá varstu öruggur. Ef hinn er glaður þá er ég glaður,“ segir hún og heldur áfram:
„Manneskjugeðjun er öryggishegðun sem hjálpaði okkur mögulega í fyrri samböndum til að koma okkur í gegnum erfiðar, óútreiknanlegar aðstæður. En ef við erum í öruggu umhverfi og samböndum en erum ennþá að hamast í manneskjugeðjun þá getur það leitt til kulnunar og örmögnunar. Það mergsýgur alla orku og dregur athyglina frá eigin tilfinningum, löngunum og þörfum.“
Ragnhildur tekur nokkur dæmi:
„Ef við erum alltaf að spyrja hvort sé ekki örugglega allt í gúddí milli okkar.
Er nokkur reiður út í okkur.
Missum svefn ef einhver er lengi að svara skilaboðum frá okkur.
Hugsum allt kvöldið um brandarann sem enginn hló að á kaffistofunni.
Marinerumst í áhyggjum ef yfirmaðurinn vill tala við okkur á morgun.“
Ragnhildur segir að tilfinningaástand annarra sé yfirleitt ekki persónulegt og ekki þitt til að lagfæra.
„Ef þú hefur gert rangt á þeirra hlut færðu tækifæri til að biðjast afsökunar. Ef þú hefur ekki gert neitt rangt berðu ekki ábyrgð á þeirra tilfinningum. Tilfinningalega þroskað fólk lætur ekki skap sitt bitna á öðrum og biður annaðhvort um andrými eða biður um stuðning.“
