Nú er aðeins rúm vika í að girnilegasta maraþon ársins, jafnvel aldarinnar, hefjist þegar að fjölskyldan í Melgerði 21 á Kársnesinu í Kópavogi bakar í sólarhring. Síðasta bakstursmaraþon var haldið á heimili fjölskyldunnar fyrir níu árum síðan og þá safnaðist rúm hálf milljón fyrir Kraft, félag ungs fólks sem greinst hefur með krabbamein. Nú á að safna fyrir Bergið headspace og auðvitað er markmiðið að slá fyrra met.

„Við erum að fara á límingunum, við erum svo spennt. Við finnum samt alveg fyrir því að taugarnar eru farnar að gera vart við sig og við vitum ekki alveg hvað við erum að ganga inn í. Síðasta maraþon var bara stemming og stuð en nú er undirtónninn dökkur, þó við reynum að smyrja á hann eins miklum glassúr og við mögulega getum,“ segir Lilja Katrín Gunnarsdóttir, fjölmiðlakona og konan á bak við bakstursbloggið Blaka – blaka.is. Eiginmaður hennar, stjörnuvefarinn Guðmundur R. Einarsson, tekur í sama streng en maraþonið að þessu sinni sprettur upp úr áfalli sem fjölskyldan varð fyrir í byrjun árs.

„Fóstursonur okkar, Guðni Alexander Snorrason, lést þann 31. janúar síðastliðinn, aðeins tvítugur að aldri. Það var gríðarlegt högg fyrir okkar litlu fjölskyldu, sérstaklega börnin okkar, sem litu ávallt á Guðna sem bróður sinn. Guðni yrði 21 árs þann 9. september næstkomandi, sem er líka afmælisdagurinn hennar Lilju. Við kvíðum þessum degi, enda fyrsti afmælisdagurinn án hans, og því vissum við fljótt að við þyrftum að reyna að snúa deginum upp í eitthvað gleðilegt. Eitthvað sem myndi heiðra minningu hans. Auðvitað blasti það við að baka sólarhring, er það ekki?“ segir Guðmundur og brosir.

Maraþonið hefst klukkan 12 á hádegi laugardaginn 6. september og lýkur sunnudaginn 7. september klukkan 12 á hádegi. Þennan sólarhring verður bakað stanslaust í Melgerði 21 í Kópavogi og allir sem vettlinga geta valdið eru velkomnir í heimsókn að fá sér kökur og kaffi. Þeir sem síðan eru aflögufærir geta styrkt Bergið, það verða posar á staðnum en einnig hægt að koma með reiðufé eða millifæra inná á styrktarreikning með skýringunni „Guðni“. Helstu styrktaraðilar maraþonsins eru Hagkaup og Ormsson en hjónin hvetja þá sem vilja leggja málefninu lið, til dæmis með því að skemmta gestum maraþonsins, að setja sig í samband við þau.

„Guðni er eitt af fjölmörgum börnum sem kerfið skilur eftir. Börnum sem eiga lítinn séns í lífinu,“ segir Guðmundur og Lilja bætir við: „Það er þyngra en tárum taki og svartur blettur á íslensku þjóðfélagi að börn eins og Guðni gleymist. Því ætlum við að tryggja að hans nafn gleymist ekki, þó það sé ekki nema þessa einu helgi þegar við bökum fyrir Guðna, og öll hin börnin, af ást og umhyggju.“

Sem fyrr segir eru allir velkomnir á bakstursmaraþonið í Melgerði 21 í Kópavogi 6.-7.september næstkomandi. Facebook-viðburðinn má nálgast hér.