Bandarísk móðir keypti kjól handa dóttur sinni. Við fyrstu sýn virðist þetta krúttlegur kanínukjóll en þegar móðirin, Savannah, skoðaði hann nánar sá hún óviðeigandi texta sem hana hryllti við.

„Einn daginn, þegar dóttir mín var að leggja sig, ákvað ég að skoða kjólinn betur og sjá hvað stóð á kjólum,“ sagði Savannah í myndbandi á TikTok.

Einn textinn sem hneykslaði hana var: „Viltu leita að páskaeggjum undir sænginni?“ (Want to have an Easter egg hunt under the covers?)

Hún sá fleiri óviðeigandi textabrot á kjólnum. Eins og: „Þú færð ókeypis peep show fyrir þennan miða.“ (This coupon entitles you to one free peep show!)

Og: „Látum eins og við séum kanínur og gerum það sem kemur náttúrulega“

Það sem Savönnuh þótti furðulegast var: „Þú hefur verið besti eiginmaður og vinur sem stelpa gæti óskað sér.“ (You’ve been the best husband and friend a girl could have ever asked for.)

Savannah sagðist vilja vara aðra foreldra við að skoða föt barnanna sinna gaumgæfilega. Netverjar voru í áfalli yfir barnakjólnum.

„Heimurinn er svo óhugnanlegur,“ sagði einn.

Verslunin biðst afsökunar

Verslunin sem seldi kjólinn hefur brugðist við og beðist afsökunar.

„Ég vil biðjast afsökunar á óviðeigandi texta á einni flík sem er seld í versluninni minni. Um er að ræða vöru frá öðrum birgja og ég tók ekki eftir textanum áður en kjóllinn fór í sölu. Textinn endurspeglar á engan hátt þau gildi sem ég stend fyrir eða styð,“ kom fram í tilkynningu frá fyrirtækinu.