Ósáttur ferðamaður segist hafa lent í túristagildru á veitingastað á Íslandi. Hann deildi raunum sínum á Reddit, í þræðinum „Shitty Food Porn“, en eins og nafnið gefur til kynna þá snýst umræðuvettvangurinn um slæman mat og matarupplifanir.

Ferðamaðurinn sagðist hafa borgað 32 bandaríska dollara, sem gerir um 3900 krónur, fyrir réttinn á ónefndum stað á Íslandi.

„Þetta kom nákvæmlega svona,“ sagði hann um diskinn, sem netverjar eru sammála um að sé ekki hinn girnilegasti. Þetta virðist vera lax ásamt meðlæti; tveimur litlum kartöflum, smá salati og sneið af sítrónu.

„Ég hefði bara staðið upp og yfirgefið staðinn. Kannski borgað fyrir drykkina, en enginn fengi borgað fyrir þessa sorglegu máltíð,“ sagði einn netverji og tóku fleiri undir.

Einn sagðist vera tilbúinn að borga níu dollara, eða 1100 krónur fyrir þessa máltíð.

„Það er eins og það sé búið að borða helminginn af máltíðinni,“ sagði annar.

„Við vorum búin að rannsaka hvaða ferðamannagildrur við ættum að forðast áður en við fórum til Íslands. Ég ráðlegg fólki að rannsaka aðeins áður en það fer erlendis,“ sagði einn.