Ný bók um ævi Margrétar prinsessu, systir Elísabetar drottningar, hefur valdið miklum titringi innan bresku hirðarinnar. Í bókinni, sem Pulitzer-tilnefndi ævisagnaritarinn Meryle Secrest skrifar, er fullyrt að drykkja Elísabetar drottningarmóður á meðgöngu hafi gert það að verkum að Margrét prinsessa fæddist með svokallað fósturalkóhólheilkenni, varanlega og óafturkræfa fötlun. Einkennin eru mismunandi hjá hverju barni fyrir sig en heilkennið getur valdið ýmsum heilsufarsvandamálum, til að mynda heilaskaða og vaxtarvandamálum.

Heilkennið,  og orsakir þess, var hins vegar ekki uppgötvað fyrr en 1973 en Margrét prinsessa fæddist árið 1930.

Secrest segir að Margrét hafi ekki sýnt líkamleg einkenni heilkennisins, en hafi allla tíð glímt við skapsveiflur, mígreni og námserfiðleika sem gætu samræmst því. Fullyrðingin gæti varpað nýju ljósi á persónuleika prinsessunnar, sem lengi var talin skapstór, óútreiknanleg og talsvert frábrugðin systur sinni, Elísabetu II.

Í bréfi sem Elísabet drottningarmóðir skrifaði eiginmanni sínum árið 1925. þegar hún gekk með Elísabetu drottningu, segir hún óttast að endurheimta aldrei „drykkjukrafta“ sína þar sem vín færi illa í hana. Engin sambærileg lýsing er til frá meðgöngu hennar með Margréti, en Secrest telur líklegt að áfengi hafi þá verið orðinn hluti af daglegu lífi hennar á ný.

Margrét var þekkt fyrir að vera skemmtileg og hnyttin, en einnig þrjósk og stundum barnaleg langt fram eftir aldri. Hún þróaði með sér mjög óheilbrigt drykkjumynstur. Drakk að sögn fyrstu vodka-appelsínblönduna sína daglega kl. 12:30, hálfa vínflösku með hádegismat og fleiri áfenga drykki fram eftir kvöldi.

Margrét lést árið 2002 eftir erfið veikindi, þar á meðal röð heilablóðfalla.

Fullyrðingarnar um fósturalkóhólheilkenni eru nýjar og umdeildar en breska konungsfjölskyldan hefur ekki tjáð sig um málið.