Brátt fer að draga til tíðinda varðandi það hver muni taka við af Daniel Craig í hlutverki James Bond og mögulega færa njósnarann útsjónarsama til nútímans.

Breski leikarinn Tom Holland hefur verið orðaður við hlutverkið um skeið en nýjustu fregnir herma að framleiðendur hafi komist að þeirri niðurstöðu að hann sé of mikið krútt til að vera sannfærandi í gervi 007.

Veðbankar eru helst að veðja á kunnuglegan hest, eða hinn 35 ára gamla Aaron Taylor-Johnson, sem nú gerir það gott í myndinni 28 Years Later. Taylor-Johnson hefur verið orðaður við hlutverkið um árabil og ekki skemmir fyrir honum að stjarna hans fer ört vaxandi.

Annar leikari sem hefur verið að gera það gott er Theo James og margir eru á því að hann eigi að hreppa hnossið. James, sem er fertugur að aldri, sló í gegn í annarri seríunni af White Lotus, þar sem hann lék sjarmerandi skítseyði, og ekki síður í Netflix-þáttunum The Gentlemen.

Þriðji leikarinn sem talinn er líklegur til að landa hlutverkinu er Jack Lowden, sem vakti mikla athygli í stórmynd Christopher Nolan, Dunkirk.