Það var mikið um dýrðir á föstudagskvöld þegar Íslensku hljóðbókaverðlaunin, Storytel Awards, voru afhent í fyrsta sinn, við hátíðlega athöfn í Hörpu.
Hjálmar Hjálmarsson hlaut verðlaun fyrir meistaralestur á bók Héðins Unnsteinssonar
Eva María Jónsdóttir fjölmiðlakona var kynnir hátíðarinnar þar sem veitt voru verðlaun fyrir bestu hljóðbókina í flokki skáldsagna, glæpasagna, barna- og ungmennabóka og almennra bóka en á Storytel awards eru bæði höfundar hljóðbóka og lesarar þeirra heiðraðir.
Lilja B. Alfreðsdóttir, mennta- og menningarmálaráðherra ávarpaði gesti og afhenti verðlaun í flokki barna- og ungmennabóka. Barnabókin Vetrargestir eftir Tómas Zoëga í lestri Sölku Sólar Eyfeld hreppti hnossið.
Í flokki glæpasagna bar sigur úr býtum frumraun Evu Bjargar Ægisdóttur, Marrið í stiganum í lestri Írisar Tönju Flygenring.
Verðlaun fyrir bestu almennu hljóðbókina hlaut Héðinn Unnsteinsson fyrir bók sína Vertu úlfur, wargus esto í lestri Hjálmars Hjálmarssonar.
Besta hljóðbókin í flokki skáldsagna þótti Gríma eftir Benný Sif Ísleifsdóttur, í lestri Þórdísar Bjarkar Þorfinnsdóttur.
Sérstök heiðursverðlaun veitti frú Eliza Reid Gísla Helgasyni fyrir mikilvægt frumkvöðlastarf í þágu hljóðbókmennta.
Lilja Alfreðsdóttir menntamálaráðherra
Sigurvegarar hlutu glæsilegt glerlistaverk eftir sænska listamanninn Ludvig Löfgren. Umgjörð viðburðarins litaðist af fordæmalausum tímum og voru sérstakar ráðstafanir gerðar til þess að tryggja tveggja metra rými milli gesta.
Forsetafrúin Eliza Reid
Hljóðbókaverðlaunin eru með fyrstu viðburðunum sem fara fram í Hörpu eftir að létt var á samkomubanni og því nutu prúðbúnir gestir samvistar – í hæfilegri fjarlægð.
Meðfylgjandi eru myndir frá viðburðinum.
Gíslia Helgason var heiðraður fyrir sitt merka frumkvöðlastarf á sviði hljóðbóka. Með honum er eiginkona hans, Herdís Hallvarðsdóttir
