Orðið á götunni er að Framsóknarflokkurinn ætli sér stóra hluti í Hafnarfirði í komandi sveitastjórnarkosningum. Mun hann bjóða fram undir merkjum Framsóknar og óháðra, til að höfða til sem flestra og vera með sem breiðasta skírskotun. Ágúst Bjarni Garðarsson, aðstoðarmaður Sigurðar Inga Jóhannssonar samgöngu- og sveitamálaráðherra, er sagður oddvitaefni Framsóknarmanna og óháðra. Þá er Bolvíkingurinn Valdimar Víðisson, skólastjóri Öldutúnsskóla sagður stefna á 2. sætið, en hann er varabæjarfulltrúi fyrir Sjálfstæðisflokkinn í Hafnarfirði, skipaði 9. sætið árið 2014.
Framsóknarflokkurinn reið ekki feitum hesti fyrir fjórum árum, kom engum manni inn, með 751 atkvæði. Reyndar er það rannsóknarefni hversu illa Framsóknarflokkurinn virðist liðinn meðal Hafnfirðinga þegar úrslit kosninga eru skoðuð í sögulega ljósi, en flokkurinn kom síðast inn manni árið 1998. Þar á undan kom hann inn manni árið 1982, en Framsókn hefur aldrei átt meira en einn mann í bæjarstjórn og þrisvar setið í meirihluta, síðast árið 1998. Í alls níu kosningum frá árinu 1954 hefur Framsókn mistekist að fá mann kjörinn.
Núverandi meirihlutinn samanstendur af Sjálfstæðisflokknum (5) og Bjartri framtíð (2) en markmið Framsóknar er að koma inn manni, allt umfram það yrði að teljast stórsigur, sögulega séð.
